Qaraqalpaqstan Respublikası Taqıyatas rayonı hákimligi

Jol infrastrukturası -ekonomikanı tezletiwshi kúsh, innovaciya hám qolaylıq dáregi

Jollar qanshelli tegis hám qáwipsiz bolsa, mámlekettiń rawajlanıwı da sonshelli turaqlı boladı. Sebebi hár bir jol - xalıqtıń erteńgi kúnine alıp barıwshı jol.  
Áyne usı maqsette rayon xalqı birlesti. Awizbirshilik, birdemlik jeńdi. Baslamalı byudjet joybarı tiykarında jol qurıw baslaması jeńip alındı. Házirde Nókis qalasınan Taqıyatas rayonına alıp kiriwshi tiykarǵı jol Qaraqalpaqstannıń 50 jıllıǵı kóshesine asfalt jatqızılmaqta. Taqıyatasta  jol infrastrukturasında sońǵı jıllarda bolmaǵan ózgerisler ámelge asırılmaqta.

Eger rayonǵa alıp kiriwshi tiykarǵı jollarda qolaylıqlar jaratılsa, rayonnıń ekonomikalıq jaǵdayı da jaqsılanadı.  Fermerler óz ónimlerin tez hám arzan bahada sata aladı. Awıl xojalıǵı ónimleri qaladaǵı bazarlarǵa da jetip baradı.

Investiciya kirip keliwine tiykar jaratıladı. Jaqsı jol jaqsı investiciya alıp keledi.Sociallıq turmıs jaqsılanadı. Jol bar jerde mektepke, emlewxanaǵa, xızmet kórsetiwge barıw ańsatlasadı. Jol infrastrukturası rayon ekonomikasın kartaǵa jayǵastırıp qoymaydı, bálkim onı  turmısqa, háreketke, rawajlanıwǵa baylanıstıradı.

Jol infrastrukturası jergilikli ekonomikanıń turaqlı rawajlanıwında tiykarǵı faktorlardan biri bolıp esaplanadı. Zamanagóy hám sapalı jol tarmaqları rayonnıń ekonomikalıq belsendiligin kúsheytedi, investiciyalıq tartımlılıǵın arttıradı hám xalıqtıń turmıs dárejesine unamlı tásir kórsetedi.

Birinshiden, jollar ekonomikalıq aylanıs tezligin arttıradı. Ónimlerdiń bazarǵa jetkeriliw múddeti qısqaradı, transport qárejetleri azayadı. Bul bolsa islep shıǵarıwshılardıń básekige shıdamlılıǵın támiyinleydi.

Ekinshiden, infrastrukturanıń rawajlanıwı jańa jumıs orınlarınıń jaratılıwına alıp keledi. Jol qurılısı, ońlaw hám oǵan baylanıslı xızmet tarawlarında kóplegen jergilikli xalıqtıń bántligi támiyinlenedi.

Úshinshiden, sapalı jollar investiciyalar hám turizmdi tartadı. Rayonǵa investorlar menen turistlerdiń kirip keliwi ekonomikalıq aylanıstı keńeytedi, xızmet kórsetiw tarawı rawajlanadı.

Tórtinshiden, jol infrastrukturası sociallıq infrastrukturalardıń jumısın da qollap-quwatlaydı. Xalıq densawlıqtı saqlaw, bilimlendiriw hám basqa da xızmetlerge operativ jetip barıw imkaniyatına iye boladı, bul bolsa rayonnıń insan kapitalınıń rawajlanıwına tiykar jaratadı.