Тақыятас районында бюджет түсимлери ҳәм салық дәраматлары додаланды
2025-06-10 17:55:00 / Министрлик
Усы жылдың биринши ярым жыллығы жуўмақлары бойынша Тақыятас районы ҳәкимлигинде мәжилис болып өтти. Оған Министрлер Кеңеси Баслығының орынбасары Н.Ерлепесов ҳәм республика дәрежесиндеги басшылар қатнасты.
Мәжилисте районның 2025-жылдың 6 айы даўамындағы бюджет түсимлери жағдайы ҳәм салық дәраматлары көрсеткишлери сын көзқарастан талланды. Салық жыйнаўда бақланып атырған кемшиликлер, таллаў ҳәм қадағалаў системасындағы машқалалар және оларды сапластырыў илажлары додаланды.
✅Салық түсимлери - мәмлекетлик бюджетти қәлиплестириўдиң тийкарғы дереги есапланады. Усы қаржылар арқалы мәмлекет тәрепинен билимлендириў, денсаўлықты сақлаў, жол қурылысы, социаллық тараў жойбарлары қаржыландырылады. Халыққа тиккелей хызмет ететуғын инфраструктуралар жаратылады ҳәм раўажландырылады.
✅ Әсиресе, соңғы реформалар нәтийжесинде мәҳәллелерде жыйналған салық түсимлериниң 10 проценти усы мәҳәллениң өзинде қалдырылыўы белгиленген. Бул болса мәҳәлле инфраструктурасын жақсылаў, социаллық жойбарларды әмелге асырыў, жергиликли басламаларды қаржыландырыў имканиятын жаратады.
➤ Мәжилис жуўмағында жуўапкерлерге салық түсимлерин арттырыў, легалластырыў ҳәм електрон есап-санақ системасын кеңнен енгизиў бойынша анық ўазыйпалар жүкленди.
✅ Усы илажлар тек ғана мәмлекет емес, ал ҳәр бир пуқараның абадан турмыс кешириўи ушын тийкар жаратады.