Elektr qáwipsizligin támiyinlew tek ǵana juwapker shólkemlerdiń wazıypası emes. Bul baǵdarda hár bir puqara, shańaraq, bilimlendiriw mákemesi, kárxana hám máhálle óziniń juwapkershiligin seziwi zárúr.

Ózbekstan Respublikası Ministrler Kabinetiniń 20.09.2026-jıldaǵı 523-sanlı qararı menen hár jılı oktyabr ayında Ózbekstanda "Elektr qáwipsizligi aylıǵı" ótkeriliwi belgilendi.

Ilajlarda xalıq, sociallıq taraw mákemeleri, xojalıq júrgiziwshi subektler hám basqa da elektr energiyası tutınıwshıları qatnasadı.

Elektr ásbaplarınan instrukciyaǵa muwapıq paydalanıw, nasaz sım hám rozetkalardı óz waqtında ońlaw, elektr tarmaqların artıqsha júklemew, balalardı elektr qurılmalarınan uzaq tutıw hám qáwipli jaǵdaylar haqqında tiyisli xızmetlerge xabar beriw arqalı kóplegen baxıtsız hádiyselerdiń aldın alıw múmkin.

Sonı umıtpaw kerek, úzilgen elektr sımı tok astında bolıwı múmkin. Sonıń ushın oǵan tiyiw, jaqınlasıw yamasa ózbasımshalıq penen onı shetke shıǵarıwǵa urınıw múmkin emes. Qáwipli aymaqtan uzaqlasıw, basqa puqaralardı eskertiw hám qánigelerge xabar beriw eń durıs háreket esaplanadı.

Juwmaqlap aytqanda, "Elektr qáwipsizligi aylıǵı" sheńberinde ámelge asırılatuǵın ilajlar xalıq arasında qáwipsizlik mádeniyatın arttırıw, elektr qurılmalarınan paydalanıw menen baylanıslı baxıtsız hádiyseler hám órtlerdiń aldın alıw, insan ómiri hám salamatlıǵın qorǵawǵa qaratılǵan.

Elektr qáwipsizligi qaǵıydalarına ámel etiw — ómirdi saqlaw, shańaraq hám jámiyet qáwipsizligin támiyinlew jolındaǵı áhmiyetli qádem bolıp esaplanadı.

R.Kurbanov

Taqıyatas rayonı ádillik bólimi

YuXKO bas yuriskonsulti