Qaraqalpaqstan Respublikası Taqıyatas rayonı hákimligi

 
Assalawma áleykum húrmetli rayon turǵınları hámde miymanları!
 

Mámleketimizde xalıqtıń migraciyası tarawın zamanagóy talaplar tiykarında jetilistiriw, mámleketlik xızmetlerdi jánede ápiwayılastırıw hámde puqaralar ushın qolay sharayatlardı jaratıw maqsetinde áhmiyetli reformalar ámelge asırılmaqta.

Sonday-aq Ózbekstan Respublikasınıń 2025-jıl 10-iyul kúni qabıl etilgen “Ózbekstan Respublikası puqaraların, shet el puqaraların hámde puqaralıǵı bolmaǵan shaxslardı jasaw jeri hám turǵan jeri boyınsha esaptan ótkeriw haqqında”ǵı 1074-sanlı Nızamı tiykarında jasaw hám turǵan jeri boyınsha esaptan ótkeriwdiń birden-bir huqıqıy sisteması engizildi.

Bıraq ámeliyatta ayrım puqaralarımız arasında usı Nızam qabıl etilgennen soń propiska sisteması pútkilley biykar etilgen degen nadurıs túsinikler ushramaqta.

Usı munásibet penen ámeldegi nızamshılıqqa muwapıq hár bir puqara turaqlı yamasa waqtınsha jasaw jerin ózgergertken jaǵdayda, jańa mánzilge kelgen kúnnen baslap on jumıs kúni ishinde belgilengen tártipte esaptan ótiwi shárt ekenligin ayrıqsha atap ótpekshimen.

-Bunıń ushın aymaqlıq Migraciya hám personallastırıw bólimshelerine, Mámleketlik xızmetler orayına yamasa Birden-bir interaktiv mámleketlik xızmetler portalı arqalı onlayn tárizde xızmetten paydalanıw múmkin.

Húrmetli  puqaralar!

Nızam talaplarına ámel etpew hákimshilik juwapkershilikke sebep boladı. Atap aytqanda Ózbekstan Respublikası Hákimshilik juwapkershilik haqqındaǵı kodeksiniń 223-statyasına tiykar, esaptan ótpesten jasaǵan puqaralarǵa bazalıq esaplaw muǵdarınıń úsh esesi muǵdarda, usı huquqbuzarlıq bir jıl ishinde tákrar sadır etilgende bes esesi muǵdarda jariyma qollanıladı. Sonday-aq puqaranıń esaptan ótpesten jasawına jol qoyǵan juwapker shaxsqa bazalıq esaplaw muǵdarınıń bes esesi, bir jıl ishinde tákirar júz berse on esesi muǵdarda jariyma belgilengen.

Nızam menen engizilgen jáne bir áhmiyetli jańalıq -ijarada turıwshılar ushın jaratılǵan qolaylıq. Endilikte ijarada turıwshılar ushın shartnama rásmiylestirilgen waqıttıń ózinde birden bir inter aktiv mámleketlik xızmetler portalı arqalı avtomatik tárizde esaptan ótkeriliedi. Bunda ijarada turıwshılardıń ishki isler organlarına keliwi, múrájat tapsırıwı, náwbet kútiwi sıyaqlı artıqsha áweregershiliklerdiń aldın aladı.  

Áhmiyetlisi, xalıqtıń óz waqtında dizimnen ótiwi mámlekketlik uyımlarǵa xalıqtıń anıq esabın júritiw, jańa jumıs orınların rejeslestiriw, turaq jay siyasatın júritiw, sociallıq hám komunallıq xızmetlerdi nátiyjeli shólkemlestiriw imkanın beredi.
 
Sonlıqtan bul sistema tek ǵana qadaǵalaw quralı emes, al aymaqlardı turaqlı rawajlandırıw, mámleketlik basqarıwdıń nátiyjeligin arttırıw hám xalıqqa qolaylıqlar jaratıwda áhmiyetli mexanizm esaplanadı.

Nızamǵa húrmet-jamiyette tártip qaǵıyda hám turaqlıqtıń eń áhmiyetli kepili bolıp esaplanadı.