Taqıyatas rayonı medicinalıq birlespesiniń baslıǵı Tabassum Ruzmetovanıń rayon xalqına MÚRÁJATÍ:
2026-07-21 10:35:00 / Министрлик
Húrmetli puqaralar!
Salamat turmıs tárizine ámel etiw, durıs awqatlanıw, turaqlı fizikalıq belsendilik penen shuǵıllanıw, zıyanlı ádetlerden waz keshiw hám óz waqtında medicinalıq kórikten ótiw arqalı den sawlığın'ızdı bekkemlewimiz múmkin.
Sebebi, salamat insan – baxıtlı shańaraq, kúshli jámiyet hám rawajlanǵan mámlekettiń tiykarı bolıp esaplanadı. Sonıń ushın, hár birimiz densawlığımızǵa biypárwa bolmay, onı saqlawdı turmısımızdıń eń áhmiyetli wazıypalarınıń biri dep biliwimiz zárúr.
Házirde elektron poliklinika densawlıqtı saqlaw sistemasın sanlastırıwda áhmiyetli orın iyeleydi. Ol medicinalıq xızmetlerdi jedel, sapalı hám ashıq-aydın shólkemlestiriwge, nawqaslar ushın qolaylıq jaratıwǵa hám shıpakerlerdiń jumıs nátiyjeliligin arttırıwǵa xızmet etedi. Sol sebepli, xalıqqa kórsetilip atırǵan medicinalıq járdem sapası jaqsılanıp, densawlıqtı saqlaw sistemasınıń nátiyjeliligi jáne de artıp barmaqta
Hayal-qızlardıń turaqlı skrining tekseriwlerinen ótiwi keselliklerdi erte anıqlaw, óz waqtında emlew hám densawlıqtı saqlawda úlken áhmiyetke iye. Skrining arqalı jatır moynı ragı, kókirek bezi kesellikleri, qantlı diabet, arterial gipertoniya hám basqa da kesellikler dáslepki basqıshta anıqlanıwı múmkin. Bul bolsa emlew nátiyjeliligin arttıradı, awır asqınıwlar hám ólim jaǵdaylarınıń aldın alıwǵa járdem beredi.
Hayal-qızlarǵa belgilengen múddetlerde medicinalıq tekseriwlerden ótiw, shıpaker usınıslarına ámel etiw hám salamat turmıs tárizine ámel etiw usınıs etiledi.
Onkologiyalıq keselliklerdi erte anıqlaw hám profilaktika insan ómirin saqlap qalıwdıń eń nátiyjeli jollarınan biri bolıp esaplanadı. Sonıń ushın, hár bir insan óz salamatlığına juwapkershilik penen qatnas jasap, turaqlı medicinalıq tekseriwlerden ótiwi zárúr.
Sonımenen birge, 40 jastan keyin júrek-qan tamır kesellikleri qáwipi artıp baradı. Xalıq arasında 40 jastan joqarı bolǵan adamlarda júrek-qan tamır keselliklerin erte anıqlaw hám profilaktikası awır asqınıwlar hám mayıplıqtıń aldın alıwda úlken áhmiyetke iye. Salamat turmıs tárizi hám turaqlı medicinalıq baqlaw uzaq hám sapalı ómir kepili bolıp esaplanadı.
Húrmetli rayon turğınları!
Sizdi óz salamatlığıńızǵa biypárwa bolmay, skrining hám profilaktikalıq medicinalıq tekseriwlerde belsene qatnasıwǵa shaqıramız.
Keselliklerdi erte anıqlaw olardı nátiyjeli emlew, asqınıwlardıń aldın alıw hám uzaq jáne salamat ómir súriwdiń eń áhmiyetli faktorlarınıń biri bolıp esaplanadı.