Taqıyatas rayonında "Salamatlıq marafonı"na start berildi
2026-06-02 11:35:00 / Министрлик
Ózbekstan Respublikası Prezidenti Administraciyasınıń qararı hám Ózbekstan Respublikası Densawlıqtı saqlaw ministrliginiń tiyisli buyrıǵına muwapıq, xalıqtıń keń qatlamın profilaktikalıq tekseriw hám skrining tekseriwlerine tartıw, kesellikler profilaktikası boyınsha xabardarlıǵın arttırıw hámde salamat turmıs tárizin úgit-násiyatlaw maqsetinde 2026-jıl 1-30-iyun kúnleri Taqıyatas rayonında "Salamatlıq marafonı" ǵalabalıq ilajı ótkeriliwi belgilengen.
Usı baslama sheńberinde Densawlıqtı saqlaw ministrligi tárepinen shólkemlestirilip atırǵan "Salamat turmısqa qaray!" súreni astındaǵı salamatlıq marafonına Taqıyatas rayonı hákimligi tárepinen rásmiy start berildi.
Ilaj sheńberinde mámleketimiz basshısınıń 2026-jıl 21-maydaǵı "Múbárek Qurban hayıtı múnásibeti menen xalıqtı mámleket tárepinen qollap-quwatlaw hám qayırqomlıq ilajların nátiyjeli shólkemlestiriw haqqında"ǵı PQ-196-sanlı qararınıń orınlanıwın támiyinlew maqsetinde, Taqıyatas rayonı hákimi I.Sdikov tárepinen rayondaǵı nawqas balalarǵa respublikalıq medicina oraylarında biypul xirurgiyalıq operaciya hám emleniw imkaniyatın beretuǵın arnawlı vaucherler tapsırıldı.
Marafon dawamında xalıqtı profilaktikalıq medicinalıq tekseriwlerden ótkeriw, júrek-qan tamır kesellikleri, qantlı diabet, onkologiyalıq kesellikler hám basqa da juqpalı bolmaǵan keselliklerdiń erte anıqlanıwın támiyinlew, sonday-aq, puqaralar arasında salamat turmıs tárizi kónlikpelerin qáliplestiriwge qaratılǵan úgit-násiyatlaw ilajları ámelge asırıladı.
Bul marafon xalıqtıń óz salamatlıǵına juwapkershiligin arttırıw, keselliklerdiń aldın alıw hám salamat jámiyetti qáliplestiriwde úlken áhmiyetke iye.
Taqıyatas rayonı hákimligi Мálimleme xızmeti