Qaraqalpaqstan Respublikası Taqıyatas rayonı hákimligi

Sol sebepli de óndiris procesindegi túrli baxtsız hádiyseler hám kásiplik keselliklerdiń aldın alıw búgingi kúnniń eń áhmiyetli wazıypalarınan birine aylanǵan. Dúnya kóleminde hár jılı 28-aprel sánesiniń «Pútkil dúnyajúzilik miynetti qorǵaw kúni» sıpatında belgili bolıwı da biykarǵa emes. Bul kún dúnya boylap iri korporaciyalardan baslap kishi kárxanalarǵa shekem bolǵan barlıq dúzilmelestirirdiń itibarın jumıs orınlarında salamat hám qáwipsiz ortalıqtı jaratıwǵa qaratıw ushın áhmiyetli imkaniyat bolıp tabıladı.

Usı áhmiyetli sáne múnásibeti menen Taqıyatas rayonında da «Qáwipsiz miynet tiykarları» temasında keńeytirilgen oqıw-seminarı shólkemlestirildi.

Ilajdıń kirisiw bóliminde Ózbekstan bilimlendiriw hám ilim xızmetkerleri kásiplik awqamı Taqıyatas rayonlıq bólimi keńesiniń baslıǵı Sayyora Bekimbetova sózge shıǵıp, búgingi kúnde miynet nızamshılıǵı hám qáwipsizligi baǵdarında mámleketimiz tárepinen ámelge asırılıp atırǵan keń kólemli reformalar hám de xızmetkerlerdiń huqıqları menen nızamlı máplerin qorǵawda kásiplik awqamlarınıń ornı haqqında átiraplı toqtap ótti.

Bunnan soń, taraw qánigeleri tárepinen áhmiyetli temalardaǵı bayanatlar tıńlandı. Atap aytqanda:

Mamanbiy Seydullaev (Qaraqalpaqstan Respublikası Kámbaǵallıqtı qısqartıw hám bántlik ministrliginiń Mámleketlik miynet inspekciyası inspektorı) — «Miynetti qorǵaw boyınsha jumıslardı shólkemlestiriw» temasında sóz etti. Ol hár bir kárxanada qáwipsizlik sistemasın huqıqıy hám texnikalıq jaqtan durıs jolǵa qoyıw, itimal qáwip-qáterlerdi aldınnan bahalaw hám olardı saplastırıwdıń zamanagóy usılları haqqında zárúr maǵlıwmatlardı usındı.
Bekpolat Ótepbergenov (Ózbekstan kásiplik awqamları Federaciyasınıń Qaraqalpaqstan keńesi miynet texnikalıq inspektorı) — «Miynetti qorǵaw boyınsha qánige hám wákil haqqında túsinikler» temasında bayanat jasap, usı baǵdarǵa juwapker shaxslardıń nızamlı statusı, wazıypaları hám juwapkershiligin túsindirip ótti.
Baxbergen Asqarov (Mámleketlik miynet huqıqı inspektorı) — «Miynet hám miynet nızamshılıǵına tiyisli máseleler» haqqında sóz etip, xızmetkerler hám jumıs beriwshiler arasındaǵı qatnasıqlardı ádalatlı qáliplestiriw, miynet shártnamalarına qatań ámel etiw hám de jumıs hám dem alıs waqıtların nızam sheńberinde anıq belgilew táreplerin ápiwayı hám túsinikli tárizde bayan etti.
Oralbay Orazbaev (Ózbekstan kásiplik awqamları Federaciyası Qaraqalpaqstan keńesiniń yuristi, bas qánigesi) — quramalı hám densawlıq ushın qáwip tuwdırıwı múmkin bolǵan sharayatlarda miynet etip atırǵan puqaralardı sociallıq hám huqıqıy qollap-quwatlaw máseleleri boyınsha áhmiyetli túsinikler berdi.
Seminardıń juwmaqlawshı bólimi óz-ara erkin sáwbet, qızǵın pikir almasıw hám ashıq soraw-juwaplar ruwxında ótti. Shólkem basshıları hám miynetti qorǵaw wákilleri ózleriniń kúndelikli jumıs iskerliginde hám óndiris processlerinde ushırasıp atırǵan túrli mashqalalı jaǵdaylar boyınsha qánigelerge múrájat etti hám hár bir sorawǵa anıq hám tiykarlanǵan juwaplar aldı.

Bunday aǵartıwshılıq ilajlar orınlarda miynetti qorǵaw baǵdarındaǵı bilim hám kónlikpelerdi bekkemlewge, jámiyette miynet mádeniyatın joqarılawǵa hám eń tiykarǵısı, hár bir jumıs ornında insan ómiri hám densawlıǵın isenimli saqlawday iygilikli maqsetke múnásip xızmet etedi.