Zamanagóy globallasıw sharayatında korrupciya tek ǵana milliy qáwipsizlikke qáwip salmay, al resurslardıń nadurıs bólistiriliwine hám sociallıq ádilsizlikke sebep boladı. Sol sebepli, mámleketimizde korrupciyaǵa qarsı gúresiw hámde usı túrdegi jınayatlardıń júz beriwiniń aldın alıwǵa qaratılǵan kompleks ilajlar sistemalı túrde ámelge asırılmaqta. Mámleket hám jámiyet turmısınıń barlıq tarawlarında korrupciya faktorların keltirip shıǵarıp atırǵan sistemalı mashqalalardı saplastırıwǵa qaratılǵan bir qatar normativlik-huqıqıy hújjetler qabıl etilip, ámeliy turmısqa engizilmekte. Bul normativlik-huqıqıy hújjetler qatarına tómendegilerdi mısal etip keltiriwimizge boladı: «Korrupciyaǵa qarsı gúresiw haqqında»ǵı Ózbekstan Respublikası Nızamı. (2017-jıl 3-yanvar).  Bunnan tısqarı, Prezidentimizdiń 2022-jıl 12-yanvardaǵı «Korrupciyaǵa qarsı gúresiw jumıslarınıń nátiyjeliligin reyting bahalawdı engiziw ilajları haqqında»ǵı PQ-81-sanlı Qararı qabıl etilip, usı qarar menen mámleketlik uyımlar hám shólkemlerde, jergilikli atqarıwshı hákimiyat uyımlarında korrupciyaǵa qarsı gúresiw, onıń kelip shıǵıw sebep hám shárt-shárayatların anıqlaw hám de aldın alıw boyınsha sistemalı ilajlar ámelge asırılmaqta.
Sonday-aq, 2025-jılı 26-dekabrde Ózbekstan Respublikası Prezidenti Shavkat Mirziyoyevtiń Oliy Májilis hám Ózbekstan xalqına Múrájatnamasında korrupciya temasına da ayrıqsha toqtap ótilgenin atap ótiw kerek: «Taǵı da, tákirar hám tákirar aytaman, Korrupciya – mámleket rawajlanıwına tosqınlıq etetuǵın, ádillik hám nızam ústinligin izden shıǵaratuǵın, jámiyette isenim ortalıǵın álsiretetuǵın eń saldamlı qáwip.
Korrupciyaǵa jol qoyıw bolsa – reformalarımızǵa qıyanet bolıp tabıladı. Bul illetke qarsı gúresiw boyınsha 2026-jılda «ayrıqsha jaǵday» daǵaza etildi.
Barlıq mekemelerde komplaens hám korrupciyaǵa qarsı ishki qadaǵalawǵa juwapker orınbasar lawazımı engiziledi. Esap palatasınıń wákili iskerligi jolǵa qoyıladı. Bul basshılar sistemadaǵı napák shaxslardı anıqlaw, sonday-aq, byudjet qarjılarınıń talan-taraj etiliwi hám lawazımdı suyiistimal qılıw jaǵdaylarınıń aldın alıw boyınsha tásirsheń qadaǵalaw ornatadı hám Prezident aldında esabat beredi.
Mámlekettiń hár bir som qarjısı, resursı boyınsha jeke juwapkershilik kúsheytiledi. Komplaens xızmetiniń iskerligine tosqınlıq etkenler – korrupciyaǵa sherik, dep bahalanadı hám juwapkershilik te soǵan sáykes boladı.
Juwmaqlap aytqanda, korrupciya jámiyet rawajlanıwına saldamlı qáwip tuwdıratuǵın, mámleketlik basqarıw nátiyjeliligin páseytetuǵın hám sociallıq ádillik principlerine zıyan jetkeretuǵın unamsız qubılıs esaplanadı. Ol ekonomikalıq rawajlanıwǵa tosqınlıq etip, puqaralardıń mámleketlik uyımlarǵa bolǵan isenimin álsiretedi hám de huqıqıy sana hám mádeniyattıń qáliplesiwine unamsız tásir kórsetedi.
Sol sebepli korrupciyaǵa qarsı gúresiw tek ǵana mámleketlik uyımlardıń emes, al pútkil jámiyettiń ulıwma wazıypası bolıwı kerek. Nızamshılıq bazasın bekkemlew, ashıqlıq hám ayqınlıqtı támiyinlew, jámiyetshilik qadaǵalawın kúsheytiw hám de xalıqtıń huqıqıy mádeniyatın asırıw korrupciyanı azaytıwda zárúrli áhmiyetke iye. Hár bir puqaranıń korrupciyaǵa mawasasız múnásibeti jámiyette ádillik hám nızam ústinligin támiyinlewge xızmet etedi.

Taqıyatas rayonı Ádillik bólimi
PHAJ bólimi baslıǵı                                        V.X. Fayzullaeva