Press-tur: Shomanayda jańa joybarlar, ámeliy nátiyjeler hám perspektivalı rejeler
2026-11-18 18:10:00 / Министрлик

Press-tur dawamında qatnasıwshılar rayonda 2026-jıl ushın belgilengen investiciyalıq baǵdarlama sheńberinde ámelge asırılıp atırǵan joybarlar, olardıń búgingi jaǵdayı, jaratılıp atırǵan óndirislik imkaniyatlar hám jańa jumıs orınları menen jaqınnan tanıstı.
Sonıń ishinde, "OAZIS OFF SHUMANAY" Juwapkershiligi sheklengen jámiyeti tárepinen ulıwma bahası 4,1 milliard somlıq ıssıxana shólkemlestiriw joybarı ámelge asırılǵan.
"Begjap" awıl puqaralar jıyını aymaǵındaǵı 1,5 gektar maydanda jaylasqan jumısı toqtatılǵan ıssıxana xojalıǵı belgilengen tártipte ajıratıp berilip, qurılıs-ońlaw jumısları alıp barılǵan. Sonday-aq, qosımsha zárúr úskene hám inventarlar ornatılǵan. Búgingi kúnde ıssıxanada pomidor jetistiriw jolǵa qoyılǵan bolıp, joybar sheńberinde 15 jańa jumıs ornı jaratılǵan.
Sonday-aq, "Aydona" shańaraqlıq kárxanası tárepinen ulıwma bahası 1,5 milliard somlıq avtomobillerge texnikalıq xızmet kórsetiw joybarı ámelge asırılmaqta. "Monshaqlı" mákan puqaralar jıyını aymaǵınan 15 sotix jer maydanı Ózbekstan Respublikası Prezidentiniń 2025-jıl 27-yanvar kúngi PP-10-sanlı Pármanına muwapıq, uzaq múddetli ijara huqıqı tiykarında ajıratılǵan. Sonıń menen birge, 1 milliard som kredit qarjısı esabınan tiyisli ásbap-úskeneler alıp kelingen.
Házirgi waqıtta kárxana tárepinen zárúr ásbap-úskenelerdi ornatıw jumısları alıp barılmaqta. Joybardıń tolıq iske qosılıwı nátiyjesinde 10 jańa jumıs ornı jaratılıwı kútilmekte.
Press-tur dawamında ǵalaba xabar quralları wákilleri joybarlardıń ámelge asırılıw procesi hám keleshektegi rejeler menen tanısıp, juwapkerler tárepinen berilgen maǵlıwmatlardı úyrendi. Bul joybarlar rayonda investiciyalıq belsendilikti arttırıw, isbilermenlikti rawajlandırıw, xalıqtıń bántligin támiyinlew hám aymaqtıń ekonomikalıq potencialın bekkemlewge xızmet etedi.







