Shomanayda mikrojoybarlar jumısı menen tanısıw maqsetinde press-tur shólkemlestirildi
2026-09-04 19:15:00 / Министрлик
Búgin, 2026-jıl 4-sentyabr kúni Shomanay rayonında ǵalaba xabar quralları wákilleriniń qatnasıwında rayondaǵı hákim járdemshileri tárepinen xalıqqa xızmet kórsetiw hám úy sharayatında óndiris baǵdarında ámelge asırılıp atırǵan mikrojoybarlardıń jumısı menen jaqınnan tanısıw maqsetinde press-tur shólkemlestirildi.
Dáslepki mánzil - "Aqjap" awıl puqaralar jıyını aymaǵında jasawshı puqara A.Jaqsımuratovtıń sharwashılıq baǵdarındaǵı mikrojoybarı boldı. Jumıstı jolǵa qoyıw hám rawajlandırıw maqsetinde Ózbekstan Respublikası Prezidentiniń PQ-49-sanlı qararı tiykarında puqara ushın 98 million som muǵdarında kredit qarjısı ajıratılǵan. Usı qarjı esabınan Mońǵol násilli 28 bas qoy satıp alınıp, sharwashılıq, atap aytqanda, qoy baǵıw hám olardıń sanın kóbeytiw jumısı jolǵa qoyılǵan. Joybar arqalı shańaraq dáramatın arttırıw, sharwa mallarınıń sanın kóbeytiw hám keleshekte qosımsha jumıs orınların jaratıw názerde tutılǵan.
Keyingi mánzil - "Aybuyir" mákan puqaralar jıyını aymaǵında jasawshı puqara Temirxanov Íqlas tárepinen jolǵa qoyılǵan nan hám nan ónimlerin islep shıǵarıw cexi boldı. Press-tur qatnasıwshıları bul mikrojoybardıń jumısı, islep shıǵarıw procesi hám jaratılǵan sharayatlar menen jaqınnan tanıstı.