Shomanayda xalıqtıń bántligin támiyinlew baǵdarında nátiyjeli joybarlar ámelge asırılmaqta
2026-09-04 18:10:00 / Министрлик
Shomanay rayonı "Diyxanabad" awıl puqaralar jıyını aymaǵında jasawshı Sh.Orazımbetov Prezidentimizdiń PQ-49-sanlı qararı tiykarında 12 procentli 45 million som muǵdarında kredit alıp, úy sharayatında termopanel islep shıǵarıw jumısın jolǵa qoyǵan. Búgingi kúnde islep shıǵarılıp atırǵan ónimlerge talap joqarı bolıp, buyırtpalar tiykarında jumısın keńeytip, qosımsha dáramat tawıp atır.
Ǵalaba xabar quralları wákilleri "Nawrız" mákan mákan puqaralar jıyını aymaǵında jasawshı ónerment N.Qádirimbetovtıń úy sharayatında milliy muzıka ásbapların tayarlaw jumısı menen de tanıstı. Oǵan Ózbekstan Respublikası Ministrler Kabinetiniń 2025-jıl 11-marttaǵı 158-sanlı qararına muwapıq, "Usta-shákirt" baǵdarlaması tiykarında shákirtler tayarlaw, zárúr shiyki zat satıp alıw hám shákirtlerdi miynet haqı menen támiyinlew ushın 7 million 500 mıń som muǵdarında subsidiya ajıratılǵan. Házirgi waqıtta ustanıń 15 shákirti bolıp, olar milliy saz ásbapların tayarlaw sırların úyrenbekte.
Sonday-aq, "Monshaqlı" mákan puqaralar jıyını aymaǵında jasawshı hayal-qızlardıń biri G.Janievanıń jumıs iskerligi menen de tanıstı. Ol 6 million 500 mıń som muǵdarındaǵı subsidiya qarjısı esabınan úy sharayatında balalar ushın jumsaq oyınshıqlar islep shıǵarıwdı jolǵa qoyǵan. Búgingi kúnde G.Janieva óz ónerin rawajlandırıw menen birge, 3 shákirtine jumsaq oyınshıqlar tayarlaw sırların úyretip kelmekte.
Bul jumıslar rayon xalqı, ásirese, hayal-qızlar hám jaslardı kásip-ónerge tartıw, úy sharayatında dáramat dereklerin jaratıw hám rawajlandırıwda úlken áhmiyetke iye bolmaqta.