Shomanay rayonında jas shańaraqlardı qollap-quwatlaw hám hayal-qızlardıń belsendiligin arttırıwǵa qaratılǵan ushırasıw ótkerildi
2026-03-25 17:05:00 / Министрлик
Búgin, Shomanay rayonında Shańaraq hám hayal-qızlardı qollap-quwatlaw jumısların jańa basqıshqa alıp shıǵıw, tayanısh rayon jumısın shólkemlestiriw máseleleri boyınsha, sonday-aq, Ózbekstan Respublikası Ministrler Kabinetiniń 2020-jıl 31-dekabr kúngi 820-sanlı "Shańaraq institutın rawajlandırıw, jaslardı shańaraqlıq turmısqa tayarlaw is-ilajları haqqında"ǵı qararınıń orınlanıwın támiyinlew maqsetinde "Qarabaylı" mákan puqaralar jıyını aymaǵında jaylasqan "Shańaraq hám hayal-qızlar orayı"nda jas shańaraqlar menen ushırasıw ótkerildi.
Onda Ózbekstan Respublikası Shańaraq hám hayal-qızlar komitetiniń bólim baslıǵı R.Mirxolikova, rayon hákiminiń orınbasarı, Shańaraq hám hayal-qızlar bóliminiń baslıǵı T.Qallıqılıchova, rayonlıq Mektepke shekemgi hám mektep bilimlendiriw bóliminiń baslıǵı N.Kurbaniyazov, Shomanay rayonı Ishki isler bóliminen aǵa leytenant G.Bekmanova,
máhállelerdegi hayal-qızlar belsendileri, nuranıy anaxanlar, tiyisli taraw wákilleri hám jas shańaraqlar qatnastı.
Ushırasıw dawamında búgingi kúnde shańaraqlıq qádiriyatlardı bekkemlew, ajırasıwlardıń aldın alıw, erte neke hám erte tuwıw jaǵdaylarına jol qoymaw, hayal-qızlarǵa bolǵan zorlıq hám basımǵa qarsı gúresiw máseleleri dodalandı.
Bunnan soń, Shomanay rayonı Jumabay jıraw Bazarov atındaǵı 13-sanlı balalar muzıka hám kórkem óner mektebi imaratında ónermentler hám máhálle belsendileri menen ushırasıw shólkemlestirildi. Ilaj dawamında ónermentshilik ónimleriniń kórgizbesi hám usı mektep oqıtıwshıları tárepinen tayarlanǵan koncert baǵdarlaması qoyıp berildi. Sonday-aq, "Nawrız" mákan puqaralar jıyınında jańadan shólkemlestirilgen kooperaciya arqalı 5 hayal-qızdıń bántligin támiyinlegen sheber hayal-qızlardıń biri N.Ernazarova menen de sáwbet ótkerildi. Sonıń menen birge, 1-sanlı mektep imaratında salamat turmıs volontyorları menen ushırasıp, endilikte isleniwi tiyis wazıypalar belgilep alındı.
"Aybuyir" mákan puqaralar jıyınında bolsa, máhálle jetiligi aǵzaları menen birgelikte shańaraqlıq qádiryatlardı bekkemlew komissiyası menen sóylesilip, shańaraqtaǵı qatnasıqlar, óz-ara tatıwlıq sıyaqlı máseleler keń túrde dodalandı.