Jaslar hám sport: Shomanayda olimpiada jarısları baslandı
2026-03-24 16:30:00 / Министрлик
2026-jıl 24-mart sánesinen baslap mámleketimiz boylap jas sportshılar arasında ótkeriletuǵın "Jańa Ózbekstan Olimpiada shıńları" hám "Prezident Olimpiadası" sport jarıslarınıń jańa máwsimine saltanatlı túrde start berildi. Bul jarıslar jas áwladtı salamat turmıs tárizine keńnen tartıw, olardıń sportqa bolǵan qızıǵıwshılıǵın arttırıw, qábiletli sportshılardı tańlap alıw hám keleshekte xalıqaralıq maydanlarda elimizdiń abırayın múnásip qorǵaytuǵın chempionlardı tárbiyalawǵa xızmet etedi.
Maǵlıwmat ornında: 2026-jılǵı máwsim sheńberindegi bellesiwler 13-14 jasar sportshılar arasında 21 olimpiada sport túri boyınsha dástúriy tárizde úsh basqıshta shólkemlestiriledi. Birinshi basqısh - "Rayon (qala) hákimi olimpiadası" mart-aprel aylarında ótkerilip, 13 sport túri qamtıp alınadı. Ekinshi basqısh - "Hákim olimpiadası" may-iyun aylarına rejelestirilgen bolıp, onda 19 sport túri boyınsha eń kúshli qatnasıwshılar anıqlanadı. Juwmaqlawshı úshinshi basqısh - "Prezident Olimpiadası"nda bolsa saylap alıw basqıshlarında jeńimpaz hám sıylı orın iyeleri bolǵan eń qábiletli sportshılar 21 sport túri boyınsha óz-ara bellesedi.
Búgin, Shomanay rayonındaǵı Sport mektebi imaratında usı jarıslardıń birinshi basqıshı - "Rayon (qala) hákimi olimpiadası" jarıslarına saltanatlı túrde start berildi. Ashılıw máresiminde rayon hákimi A.Ametov, "Nókis gúres sheberlik mektebi" niń direktorı S.Jusupbekov, rayonlıq Sport mektebiniń direktorı R.Reymov, rayonlıq Jaslar isleri bóliminiń baslıǵı F.Xodjabaev, "Nuranıy qorı" rayonlıq bóliminiń baslıǵı D. Nietullaev, nuranıylar hám jas sportshılar qatnastı.
Ilajda shıǵıp sóylegenler, bunday sport jarısları jaslardı fizikalıq jaqtan salamat, ruwxıy jaqtan bárkamal etip tárbiyalawda áhmiyetli orın iyeleytuǵınlıǵın, olardıń sportqa bolǵan qızıǵıwshılıǵın jáne de arttıratuǵının ayrıqsha atap ótti. Sonday-aq, keleshekte elimizdiń abırayın xalıqaralıq arenalarda múnásip qorǵaytuǵın qábiletli sportshılardı anıqlaw hám qollap-quwatlaw máselesine de ayrıqsha itibar qaratıldı.
Saltanatlı ashılıw máresiminen soń sporttıń basketbol (3x3) túri boyınsha ul balalar hám qızlar arasında dáslepki bellesiwler baslandı.