Elimizde korrupciyaǵa qarsı gúresiw mámleketlik siyasattıń tiykarǵı baǵdarlarınan biri sıpatında izbe-iz ámelge asırılmaqta. Bul baǵdarda qabıl etilgen normativlik-huqıqıy hújjetler reformalardıń bekkem huqıqıy tiykarın jaratpaqta.

Elimizde korrupciyaǵa qarsı gúresiw mámleketlik siyasattıń tiykarǵı baǵdarlarınan biri sıpatında izbe-iz ámelge asırılmaqta. Bul baǵdarda qabıl etilgen normativlik-huqıqıy hújjetler reformalardıń bekkem huqıqıy tiykarın jaratpaqta.
Atap aytqanda, "Korrupciyaǵa qarsı gúresiw haqqında"ǵı Nızam korrupciyaǵa baylanıslı huqıqbuzarlıqlardıń aldın alıw, olardı anıqlaw hám saplastırıwdıń tiykarǵı mexanizmlerin belgilep berdi. Sonday-aq, bul tarawda mámleketlik uyımlar hám lawazımlı shaxslardıń juwapkershiligin kúsheytiwge xızmet etpekte.
Sud sistemasında da áhmietli nızamshılıq reformaları ámelge asırıldı. "Sudlar haqqında"ǵı Nızam hám processuallıq kodekslerge kirgizilgen ózgerisler sudyalardıń erkinligin támiyinlew, jumıslardı qalıs hám ádil kórip shıǵıwǵa qaratılǵan. Elektron sudlaw sistemasınıń engiziliwi, sonıń ishinde, "E-SUD" platforması arqalı shaǵım arzaların onlayn beriw hám jumıslardı baqlaw imkaniyatı insan faktorın azaytıp, korrupciya qáwpin azaytpaqta.
Bunnan tısqarı, "Mámleketlik uyımlar jumısınıń ashıq-aydınlıǵı haqqında"ǵı Nızamǵa muwapıq, sudlardıń jumısında ashıq-aydınlıq támiyinlenbekte. Ashıq sud májilisleri, sud qararlarınıń járiyalanıwı jámietlik qadaǵalawdı kúsheytip, korrupciyanıń aldın alıwǵa xızmet etpekte.
Juwmaqlap aytqanda, qabıl etilgen nızamlar hám ámelge asırılıp atırǵan reformalar sud sistemasında ádillik, ashıq-aydınlıq hám nızamlılıqtı támiyinlew arqalı korrupciyaǵa qarsı gúresiw nátiyjeliligin jáne de arttırmaqta.

Qaraqalpaqstan Respublikası
Mámuriy sud arxiv baslıǵı G.Kalbaeva