Ózbekstan Respublikası Shańaraq Kodeksinde ata-ana er jetpegen balalarına támiynat beriwi shárt dep kórsetilgen. Er jetpegen balalarına támiynat beriw minnetlemesin ıqtiyarlı ráwishte orınlamaǵan áke yamasa anadan sudtıń sheshiwshi qararına yamasa sud buyrıǵına tiykar aliment óndiriledi.

Er jetpegen balalarǵa aliment tólew haqqında ata-ana arasında kelisim bolmaǵanda yamasa aliment ıqtıyarlı túrde tólenbegende hám ata-anadan birı aliment óndiriw haqqında sudqa dawa yamasa arza menen múráját etpegen jaǵdaylarda, qáwenderlik hám ámengerlik organları, sonıń menen birge on tórt jasqa tolǵan bala er jetpegen balanıń támiynatı ushın áke yamasa anadan nızamda belgilengen muǵdarda aliment óndiriw haqqında dawa qozǵatıwǵa haqılı bolıp tabıladı.

  Ata-ana hám bala bólek jasaǵan jaǵdayda, qáwenderlik hám ámengerlik organları, sonıń menen birge on tórt jasqa tolǵan bala bir waqıttıń ózinde áke hám anadan er jetpegen balalardıń támiynatı ushın aliment óndiriw haqqında dawa qozǵatıwǵa haqılı.

   Er jetpegen balalarına aliment tólew hám olarǵa támiynat beriwde ata-ananıń minnetlemeleri teń bolıp tabıladı.

 Er jetken, miynetke uqıpsız, járdemge mútáj balalarına támiynat beriwde ata-ananıń minnetlemeleri teń bolıp esaplanadı.

Ata-ana er jetpegen balalarına támiynat beriw ushın aliment tólew tártibin óz-ara kelisken halda belgilewge haqılı.

 Er jetpegen balalarına támiynat beriw ushın aliment tólew tártibi  haqqında ata-ana arasındaǵı kelisim nızamda belgilengen qaǵıydalarǵa hám balanıń máplerine qarsı bolmawi kerek.

  Eger er jetpegen balalarına támiynat beriw haqqında ata-ana arasında kelisim bolmasa, olardıń támiynatı ushın aliment sud tárepinen ata-ananıń hár aydaǵı mıynet haqı yamasa basqa tabısınıń bir bala ushın-tórtdan bir bólegi; eki bala ushın-úshten bir bólegi; úsh hám onnan artıq bala ushın-yarım muǵdarında óndiriledi. Bul tólewlerdiń muǵdarı táreplerdiń materiallıq yamasa shańaraqqa tiyisli jaǵdayın hám basqa itibarǵa ılayıq jaǵdaylardı esapqa alǵan halda sud tárepinen kemeytiriliwi yamasa kóbeyiwi múmkin.

 Hár bir bala ushın óndiriletuǵın aliment muǵdarı nızamshılıq penen belgilengen miynetke haqı tólewdiń eń kem muǵdarınıń 26,5 payızınan kem bolmawi kerek.

Shomanay rayonı ádillik bólimi

PHAJ bólimi 1-dárejeli inspektorı:               P.Ibraimova