Ózbekstan - ulıwma úyimiz
2026-02-07 11:25:00 / Министрлик
Ózbekstan - túrli millet hám xalıq wákilleri tınısh-tatıw, óz-ara húrmet hám awızbirshilikte jasap kiyatırǵan keńpeyil hám muqaddes diyar bolıp esaplanadı. Bul jerde ózbek xalqı menen bir qatarda qaraqalpaq, qazaq, túrkmen hám basqa da kóplegen millet wákilleri ázelden iyinles bolıp miynet etip, birden-bir Watannıń rawajlanıwı jolında birlesip kelmekte. Sonıń ushın Ózbekstan hár bir puqara ushın ulıwma úy, miyrim-shápáát hám tatıwlıq mákanı bolıp esaplanadı.
Búgingi kúnde elimizde 130 dan aslam millet hám xalıq wákilleri jasamaqta. Respublika aymaǵında 150 den aslam milliy mádeniy oraylar jumıs alıp barıp, túrli xalıqlardıń tili, mádeniyatı, úrp-ádet hám dástúrlerin qásterlep saqlaw jáne rawajlandırıwǵa múnásip úles qospaqta. Bul bolsa elimizde milletleraralıq tatıwlıq hám diniy keńpeyillik mámleketlik siyasattıń tiykarǵı baǵdarlarınan biri ekenin ayqın kórsetedi.
Ózbekstan - túrli milletler hám táǵdirler birden-bir maqset, yaǵnıy tınıshlıq, turaqlılıq hám rawajlanıw jolında birlesken muqaddes mákan. Atap aytqanda, qaraqalpaq hám ózbek xalıqları arasındaǵı tuwısqanlıq, doslıq hám óz-ara húrmet qatnasıqları ásirler dawamında qáliplesip, búgingi kúnde de bekkem birge islesiw hám tatıwlıqtıń úlgisi bolıp kelmekte.
Juwmaqlap aytqanda, Ózbekstan - ózbek, qaraqalpaq hám elimizde jasap atırǵan barlıq millet hám xalıqlar ushın birden-bir Watan. Onı qásterlep saqlaw, jáne de rawajlandırıw hám keleshek áwladqa abat hám abadan halında tapsırıw hár birimizdiń muqaddes minnetimiz bolıp esaplanadı.