Hákimshilik sudlar tárepinen sud ámeliyatında salıq nızamshılıǵın qollanıwdıń ózine tán ózgeshelikleri Salıq kelispewshiliklerin kóriwde sudlar tárepinen nızamshılıq hújjetlerin durıs hám bir túrde qollanılıwın támiyinlew maqsetinde Ózbekstan Respublikası Joqarǵı sudı Plenumınıń 2023-jıl 20-fevraldaǵı 4-sanlı qararı qabıl etilgen. Hákimshilik sudlarda kóriletuǵın salıqqa baylanıslı kelispewshilikler boyınsha Salıq uyımınıń, olardıń lawazımlı shaxslarınıń qararları, háreketleri (hárekecizligi) ústinen shaǵım etiw haqqındaǵı isler MSIYUtKniń 23-babı tártibinde kórip shıǵıladı.

Salıq uyımınıń kóshpeli salıq tekseriwi hám salıq auditi nátiyjeleri boyınsha qabıl etilgen qararı ústinen berilgen shaǵım joqarı turıwshı salıq uyımı tárepinen nızamda belgilengen múddetlerde kórip shıǵılmaǵanlıǵı, sonıń menen birge, sudlardıń itibarı salıq tólewshi sudqa joqarı turıwshı salıq uyımı lawazımlı shaxsınıń shaǵımdı múddetinde kórip shıqpawda kórsetilgen háreketsizligi ústinen arza (shaǵım) menen múrájat etiwi múmkin ekenligine qaratılıwı, joqarı turıwshı salıq uyımına shaǵım etilgende salıq uyımınıń qararları ústinen sudqa shaǵım etiw múddeti, tómengi salıq uyımınıń qararı qabıl etilgen kúnnen baslap óte baslaydı.

Sudqa múrájat etiwdiń ótkerip jiberilgen múddetin tiklew haqqındaǵı máseleni sheshiwde, sudlar arza beriwshiniń dawlasıp atırǵan qarar yaki háreket (háreketsizlik) haqqında bilgen yaki bilmegenligine, arza beriwshi óziniń buzılǵan huqıqların tiklew boyınsha qanday ilajlar ámelge asırǵanına itibar qaratıwı lazım. Sud hár bir is boyınsha arza beriwshi tárepinen nızam menen belgilengen sudqa múrájat etiw múddetlerine ámel etilgenligin anıqlawı, bul múddetler buzılǵan jaǵdayda bolsa, mápdar shaxstıń múddetti ótkerip jiberiwge sebep sıpatında keltirilgen sebeplerin dodalawı lazım.

Salıq uyımınıń qararı haqıyqıy emes, lawazımlı shaxsınıń háreketi (háreketsizligi) nızamǵa qayshı dep tabılǵan jaǵdayda, sudlar MSIYK 189-statyasınıń 5-bólimine muwapıq, tiyisli salıq uyımı yamasa lawazımlı shaxsqa salıq tekseriwi materialların qayta kórip shıǵıw yamasa shaxstıń buzılǵan huqıq hám nızamlı máplerin tiklew ushın nızamda názerde tutılǵan háreketlerdi ámelge asırıw minnetlemesin júklew máselesin dodalawı lazım. Máselen, salıq tekseriwi materialların kórip shıǵıw tártibiniń áhmietli shártlerin (salıq tekseriwi materialların kórip shıǵıw procesinde salıq tólewshi jeke ózi hám (yamasa) óz wákili arqalı qatnasıw imkaniyatı támiyinlenbegenligi, salıq tólewshige túsindiriwler beriw imkaniyatı jaratılmaǵanlıǵı, salıq tekseriwi materialları wákilsiz shaxs tárepinen kórip shıǵılǵanlıǵı) buzıwına jol qoyılǵanda, salıq tekseriwi materialların qayta kórip shıǵıw minnetlemesi júkleniwi lazım.

Nókis rayonlar aralıq hákimshilik
sudı baslıǵı R.Jumabaev