QMU Shımbay fakultetinde piyshenbi jaslar kúni múnasebeti menen Taraw qánigeleri qatnasında ushırasıw bolıp ótti
2026-03-26 12:50:00 / Министрлик
Búgin Berdaq atındaǵı Qaraqalpaq mámleketlik universiteti Shımbay fakultetinde piyshenbi jaslar kúni múnasebeti menen Taraw qánigeleri qatnasında ushırasıw bolıp ótti. Ilajǵa Shımbay rayonı mámleketlik qáwipsizlik xizmeti baslıǵı J.Umarov Shımbay rayonı prokurorı R.Xalmuratov,Shımbay rayonı IIB bólim baslıǵı A.Masharipov,Jaslar isler agentligi baslıǵı A.Genjemuratov Shımbay rayonı Salıq inspeksiyası bólimi baslıǵı S.Artikov, fakultet dekanı A.Najimov, professor-oqıtıwshılar, fakultettiń belsendi hám qábiletli student-jasları qatnastı.
Bul ushırasıwdıń tiykarǵı maqseti - jaslarǵa mámleketlik siyasattıń tiykarǵı baǵdarları, ásirese jaslar menen islesiw baǵdarında alıp barılıp atırǵan jumıslar haqqında maǵlıwmat beriw, olardıń mashqalaları hám usınısların tıńlaw, sonday-aq, jaslardıń jámiyettegi ornı hám rolin bekkemlewden ibarat boldı.
Ushırasıw dawamında Shımbay rayonı prokurorı R.Xalmuratov búgingi kúnde jaslarǵa jaratılıp atırǵan sharayatlar, bilimlendiriw, bántlik, isbilermenlik hám sociallıq tarawlardaǵı imkaniyatlar haqqında toqtap ótti. Ol, sonday-aq, jaslarǵa múrájat etip, olardı belsendi puqaralıq poziciyasın iyelewge, óz ideyaları hám baslamaları menen Watan rawajlanıwı jolında xızmet etiwge shaqırdı.
Bunnan soń, ushırasıw ashıqtan-ashıq sóylesiw formatında bolıp ótti. Studentler ózlerin qızıqtırǵan sorawlar menen múrájat etip, usınıs hám pikirlerin bildirdi. Olardıń ayırımları tikkeley qánigeler tárepinen ornında sheshilip, ayırımları boyınsha tiyisli juwapkerlerge tapsırmalar berildi.
Ilaj juwmaǵında qatnasıwshılar bunday ushırasıwlar turaqlı túrde shólkemlestiriliwi kerek ekenligin, bul bolsa jaslar hám jergilikli hákimiyat arasındaǵı óz-ara isenimdi jáne de bekkemleytuǵının atap ótti. Bul ushırasıw jaslarda Watanǵa sadıqlıq, pidayılıq, sociallıq belsendilik hám jetekshilik kónlikpelerin qáliplestiriwde áhmiyetli faktor bolıp xızmet etedi.