Qaljan Ayımbetova "Jıl hayalı" tańlawınıń respublikalıq basqıshı jeńimpazı
2025-12-24 18:05:00 / Министрлик
Ózbekstan Respublikası Shańaraq hám hayal-qızlar komiteti tárepinen "Jıl hayalı" milliy tańlawı járiyalanǵan bolıp, onda mámleketlik hám jámiyetlik turmısta belsene qatnasıp, óziniń miyneti, sociallıq belsendiligi, shańaraqtaǵı ibratlı úlgisi hám perzentler tárbiyasındaǵı múnásip ornı menen ajıralıp turǵan hayal-qızlardı anıqlaw hám xoshametlew maqset etilgen.
Tańlawdıń rayonlıq basqıshında máhállelerden mámleketimizdiń siyasiy, ekonomikalıq hám sociallıq turmısında belsene qatnasıp kiyatırǵan, miynet jámáátlerinde joqarı nátiyjelerge erisken, shańaraqta hám jámiyette órnek bolıp kiyatırǵan belsendi hayal-qızlar qatnastı.
Bul tańlawdıń respublikalıq basqıshında elimizdiń sociallıq-ekonomikalıq rawajlanıwına múnásip úles qosıp kiyatırǵan, jámiyetlik jumıslarda belsendilik kórsetip atırǵan bir topar hayal-qızlar múnásip sıylıqlandı.
Atap aytqanda, rayonımızdaǵı 52-sanlı ulıwma bilim beriw mektebiniń direktorı Ayımbetova Qaljan Jollibayevna "Jıldıń eń jankúyer oqıtıwshısı" nominaciyası menen sıylıqlandı. Qaljan Jollıbaevnaǵa juwapkershilikli hám maqtanıshlı miynet jolında bunnan bılay da joqarı nátiyjeler, bekkem densawlıq hám úlken tabıslar tileymiz.
Qońırat rayonı hákimligi málimleme xızmeti