Prezident qararı túsindirildi
2025-12-11 10:30:00 / Министрлик
Ózbekstan Respublikası Prezidenti tárepinen 2025-jıl 12-avgustta qabıl etilgen "Jeke tártiptegi isbilermenler hám ózin-ózi bánt etken shaxslar ushın qolaylı sharayatlar jaratıw ilajları haqqında"ǵı PQ-247-sanlı qararınıń mazmun-mánisi, maqseti hám tiykarǵı wazıypaların túsindiriw maqsetinde Qońırat rayonı hákimliginiń kishi májilisler zalında seminar bolıp ótti.
Seminarda rayon hákiminiń birinshi orınbasarı J.Kurbaniyazov, Sanaatqurılısbank Qaraqalpaqstan BXO baslıǵı wazıypasın atqarıwshı A.Joldasbaev hám rayonlıq Salıq inspekciyası baslıǵınıń orınbasarı M.Ganievler qarardıń mazmunı hám ámeliy táreplerin qatnasıwshılarǵa túsindirdi. Ilajda máhállelerdegi hákim járdemshileri, kommerciyalıq banklerdiń xızmetkerleri hám tiyisli taraw basshıları qatnastı.
Seminar arqalı sanlı platformalar arqalı isbilermenler hám ózin-ózi bánt etken shaxslar ushın qolaylı sharayatlar jaratıw, salıq hám finanslıq esap-sanaqlardı ápiwayılastırıw, elektron xızmetlerden paydalanıw imkaniyatları boyınsha túsinik berildi.
Sonday-aq, Qońırat diyqan bazarı hám sawda orınlarına shıǵıp, salıq inspekciyası xızmetkerleri tárepinen qarardıń mazmun-mánisi túsindirildi.
Qońırat rayonı hákimligi málimleme xizmeti