Jap-salmalar betonlastırılmaqta
2025-08-18 20:15:00 / Министрлик
Qanlıkól rayonında xalıqtıń turmıs sharayatın jáne de jaqsılaw, suw támiynatı hám irrigaciya sistemasın bekkemlew maqsetinde bir qatar ámeliy jumıslar alıp barılmaqta.
Rayondaǵı “Jańa qala” APJ, “A.Begimov” hám “Ferma awılı” elatlı punktleri ishki jap-salmalarınıń eskirip batıl bolıp qalıwı turǵınlar hám usı aymaqtaǵı onlap diyqan hám fermerler ushında suw jetkerip beriwde mashqalaǵa aylanǵan edi.
Házir usı “Báwen” jap Qanlıkól Suw jetkerip beriw mámleketlik mákemesi tárepinen betonlaw jumısları alıp barılmaqta.
Rayon hákimi B.Sultanov bul jumıslar menen tanısıp arnawlı texnika járdeminde betonlaw jumıslarına joqarı baha berdi. Bul ilaj arqalı suwdı durıs bólistiriw, ısırapgershiliktiń aldın alıw hám egislik maydanlarına sapalı suw jetkerip beriw imkaniyatı jaratıladı.
Juwapkerlerdiń atap ótiwinshe, ishki salmalardı betonlaw jumısları sebepli suw aǵımınıń baǵdarı jaqsılanadı, suwdan únemli paydalanıw imkaniyatı keńeyedi hám xalıqtıń suwǵarıwdaǵı mashqalaları saplastırıladı.
Xalıq hám diyqanlar bul jumıslardan quwanıshlı ekenin bildirip, bunday baslamalar aymaqtıń ekonomikalıq rawajlanıwına, ásirese, awıl xojalıǵı ónimleriniń zúráátliligine úles bolıp sanaladı.
Qanlıkól rayonı hákimliginiń Málimleme xızmeti