Qanlıkól rayonında suwdı tejeytuǵın texnologiyalar keńnen engizilmekte
2026-07-08 09:10:00 / Министрлик
Qanlıkól rayonında Ózbekstan Respublikası Prezidentiniń 2022-jıl 4-marttaǵı "Awıl xojalıǵında suwdı únemleytuǵın texnologiyalardı engiziwdi bunnan bılay da jedellestiriw ilajları haqqında"ǵı PP-144-sanlı qararınıń orınlanıwın támiyinlew maqsetinde suw resurslarınan aqılǵa uǵras paydalanıw hám suwdı únemleytuǵın texnologiyalardı keńnen engiziw boyınsha izbe-iz jumıslar ámelge asırılmaqta. 2026-jılı rayonda 85 gektar paxta maydanlarında 4 komplekt iyiliwsheń qubırlar arqalı suwǵarıw texnologiyasın engiziw rejelestirilgen. Házirgi waqıtta "Bostan" máhállesi aymaǵındaǵı "Tawmurat biy" fermer xojalıǵı tárepinen bir komplekt iyiliwsheń qubırlar ornatılıp, paxta maydanların usı texnologiya tiykarında suwǵarıw jumısları alıp barılmaqta. Qániygelerdiń atap ótiwinshe, bul texnologiya suwdı tikkeley qarıqlarǵa jetkerip beriw arqalı filtrlew hám puwlanıw esabınan júzege keletuǵın joǵaltıwlardı sezilerli dárejede azaytadı. Nátiyjede suwdan nátiyjeli paydalanıw, suwǵarıw múddetin qısqartıw hám hár bir gektar jer maydanına suwdıń normada bólistiriliwi támiyinlenedi. Qanlıkól rayonında suwdı únemleytuǵın texnologiyalardı keńnen engiziw boyınsha ámelge asırılıp atırǵan jumıslar suw resurslarınan nátiyjeli paydalanıw, fermer xojalıqlarınıń ekonomikalıq nátiyjeliligin arttırıw hám awıl xojalıǵın turaqlı rawajlandırıwda úlken áhmiyetke iye bolmaqta.