Qaraqalpaqstan Respublikası Nókis qalası hákimligi

NÓKISTE 18 HAYALǴA 20 MILLION SWMLÍQ VAUCHERLER TAPSÍRÍLDÍ

Mámleketimiz basshısı tárepinen alıp barılıp atırǵan reformalardıń eń tiykarǵı maqseti-adamlardı búgingi turmıstan razı etiw bolıp tabıladı. Tuwrısın aytqanda, búgin hayal-qızlarımızǵa kórsetilip atırǵan bunday itibar hám berilip atırǵan keń mumkinshilikler burın hesh qashan bolmaǵan.

Mine usınday iygilikli hám mánzilli jumıslardıń ámeliy kórinisi sıpatında, Nókis qalasında "Eń jaqsı sociallıq joybarlar" tańlawınıń jeńimpazların qollap-quwatlawǵa qaratılǵan qızǵın hám quwanıshlı ilaj bolıp ótti.

Tańlawda óz joybarları menen jeńimpaz bolǵan hám "Hayallar dápteri" arqalı járdemge mútáj dep tabılǵan 18 intaker hayal-qızlarımızǵa vaucherler jáne hár birine 20 million swmlıq zamanagóy tigiw mashinaları tapsırıldı.

Ilajda Nókis qalası hákiminiń orınbasarı — Shańaraq hám hayal-qızlar bóliminiń baslıǵı Z.Dauletnazarova qatnasıp, jeńimpazlardı qızǵın qutlıqladı. Bul tigiw mashinaları hayal-qızlarımızdıń óz ayaǵında bekkem turıwı, shańaraǵına bereket alıp kiriwi ushın berilgen úlken imkaniyat ekenin atap ótti.

Tigiw mashinaları tek ǵana 18 joybar iyesiniń emes, al máhállelerdegi júzlegen hayal-qızlardıń turmısına bereket alıp kiredi degeni.

Joybar sheńberinde máhállelerdegi 100 den aslam hayal-qızlar tigiwshilik kásibin nolden úyrenip, sheber tigiwshi bolıp jetisedi.

Ilajda úskene hám vaucherlerdi qolǵa kirgizgen hayal-qızlarımız quwanıshların jasıra almay, ózleriniń jaqsı tileklerin bildirdi: "Aldın óz jumısıńdı baslaw, bir tigiw mashinasın alıw ushın jıllap pul jıynaw yamasa qarızǵa alıw kerek edi. Búgin bolsa mámleketimizdiń ózi 20 million swmlıq zamanagóy tigiw mashinasın qolımızǵa tapsırmaqta. Bunday itibar hám ǵamqorlıq burın hesh qashan bolmaǵan! Biz endi úyde otırmaymız, máhállemizdegi 100 den aslam hayal-qızlarǵa óner úyretip, hámmemiz birgelikte hadal ırısqı-nesiybemizdi tabamız," — deydi joybar jeńimpazlarınan biri S.Turemuratova.

Ilaj juwmaǵında joybar jeńimpazları hám Nókis qalası hákimligi arasında Májbúriyat shártnamalarına qol qoyıldı.

Berilgen sociallıq járdem hám mámleketlik granttan únemli paydalanıw, máhálledegi hayal-qızlardı biypul oqıtıw hám olardı jumıs penen támiyinlew boyınsha joybar iyelerine júklendi. Processlerdiń haqıyqıy hám mánzilli orınlanıwı turaqlı qadaǵalawda boladı.

Bir sóz benen aytqanda, Nókiste baslanǵan bul iygilikli háreket hayal-qızlarımızǵa bolǵan joqarı isenim hám olardıń abadan keleshegi ushın taslanǵan jáne bir bekkem qádem boldı