Qaraqalpaqstan Respublikası Nókis qalası hákimligi

Uzaq  mánzillerden Nókiske jańa nápes

Qaraqalpaqstannıń paytaxtı bolǵan , kewili teńizdey keń Nókis búgin pútkúlley jańasha nápes penen ómir súrmekte. Sońǵı jıllarda qala kóshelerin aralar ekensiz, hár bir qádemde ózgerislerdiń, jańalanıwlardı sezinesiz. Bul tek ǵana sanlar yamasa esabatlardaǵı qurı kórsetkishler emes — bul adamlardıń turmısında, jaslardıń kózindegi úmitte, jańa qurılıp atırǵan imaratlardıń biyikliginde boy kórsetip atırǵan janlı haqıyqat.

Usı jıldıń ózinde qalamızǵa tuwrıdan-tuwrı sırt el investiciyalarınıń kólemi 100 million dollardan asıp ketti. Túrkiyalı sherikler tárepinen boy kóterip atırǵan sawlatlı 24 qabatlı turaq jaylar hám 5 juldızlı miymanxana kompleksi, Qıtaydan alıp kelinip atırǵan 120 zamanagóy elektrobus, farmacevtika hám óndiris kárxonaları — bulardıń barlıǵı Nókistiń tek ǵana óndiris emes, al zamanagóy hám qolaylı maskanǵa aylanıp atırǵanınan derek beredi.

Eksport geografiyasınıń Ázerbayjan, Mongoliya, Siriya hám Polsha sıyaqlı mámleketler esabınan keńeygeni, milliy brendlerimizdiń — "EVOS", "Oqtepa Lavash", "Safia", "INBAZAR" sıyaqlı tarmaqlardıń kóshelerimizden orın alǵanı nókislillerdiń turmıs mádaniyatı hám imkaniyatları keskin ózgerip atırǵanın kórsetedi. Jergilikli isbilermenlerimiz islep shıǵarıp atırǵan sanaat ónimleri, qurılıs materialları hám konditer ónimleri endi dúnya bazarına jol almaqta.

Eń áhmiyetlisi — bul joybarlardıń artında insan hám onıń mápleri tur. Jańa jumıs orınları, júzlegen shańaraqlarǵa kirip atırǵan qut-bereket hám keleshekke bolǵan isenim qalamızdıń haqıyqıy ekonomikalıq kelbetin belgilep bermekte.

Nókis búgin tek ǵana ózgerisler , jańalanıwlar maydanı emes, ol erteńgi kúnine isenimli nıq qádem taslamaqta. Lokomotiv joybarlar, infrastrukturanıń keńeyiwi hám sırt el socollaborators/sherikliginiń bekemleniwi Nókisti jańa imkaniyatlar, arzıwlardıń orınlanıw  qalasına aylandırmaqta.
Usı múnásibet penen usı jıldıń 10-sentyabr kúni jergilikli ǴXQ wákilleri bolǵan jurnalist hám blogerlerimzdi qala hákimligi shólkemlestiriliwindegi baspasóz konferenciyasına mirát ettik.
Olarǵa qaladaǵı investiciyalıq  jańalanıwlar haqqında Nókis qalası hákiminiń orınbasarı - investiciyalar hám sırtqı sawda bóliminiń baslıǵı Gamzat Davletmuratov  maǵlıwmat berdi.