Qaraqalpaqstan Respublikası Nókis qalası hákimligi

Muhammed Áliyge Prezident sawǵası hám minetdarshılıq xatı tapsırıldı
Húrmetli Prezidentimizdiń Qaraqalpaqstanǵa saparı waqtında sociallıq tarmaqlarda Muhammed Áliy atlı balanıń haq kewil, pák qálbi hám Watanǵa bolǵan mehri menen Prezidentimiz benen ushırasıwǵa bolǵan niyeti, bildirgen pikirleri kópshiliktiń mehiri hám itibarın tartqan edi. 
Búgin Muhammed Áliyge húrmetli Prezidentimiz onıń balalarsha pák qalbi menen jollaǵan videomúrájatın kórgenin hám bunnan júdá kewli tolǵanın aytıp, «Sen de úlkeygenińde ata-babalarımızǵa múnásip, el-jurtına paydası tiyetuǵın insan bolıwıńdı qáleymen» degen jıllı sózler menen minnetdarshılıq xatı jetip keldi.  
Húrmetli Prezidentimizdiń minnetdarshılıq xatı hám sawǵaları Qaraqalpaqstan Respublikası Joqarǵı Keńesinde saltanatlı túrde tapsırıldı.
Onda Joqarǵı Keńes Baslıǵı Amanbay Orınbaev húrmetli Prezidentimizdiń shın kewilden jazılǵan minnetdarshılıǵın oqıp esittirdi. 
Sonday-aq, Muhammed Áliyge óz aldına Prezident sawǵası hám onıń ata-anası, tárbiya alıp atırǵan mektepke shekemgi bilimlendiriw shólkemine Prezident sawǵaları tapsırıldı. Bunnan tısqarı, balajannıń tárbiyashısı Gúlbaxar Saparovaǵa Joqarǵı Keńestiń Prezidium qararı menen «Watan pidayısı» kókirek belgisi tapsırıldı.