Prezident Shavkat Mirziyoevtiń basshılıǵında 19-sentyabr kúni Nókis qalasında Qaraqalpaqstandı sociallıq-ekonomikalıq rawajlandırıw máselelerine baǵıshlanǵan májilis bolıp ótti.
2026-09-19 17:00:00 / Jańalıqlar
Prezident Shavkat Mirziyoevtiń basshılıǵında 19-sentyabr kúni Nókis qalasında Qaraqalpaqstandı sociallıq-ekonomikalıq rawajlandırıw máselelerine baǵıshlanǵan májilis bolıp ótti.
Keyingi jılları aymaqtı rawajlandırıw ushın úlken qarjılar ajıratılıp, ayrıqsha jeńillik hám sharayatlar jaratıldı. Payda, jer hám múlk salıqları 2 esege, sanaat kárxanaları ushın elektr tarifi 15 procentke tómenletildi, sociallıq salıq 1 procent etip belgilendi. Ótken jılı 1 milliard 700 million dollar investiciya kirgizildi. Bul 2021-jıldaǵıdan 22 esege kóp. Usı jıldıń birinshi yarımında ekonomika 10,2 procentke ósip, Qaraqalpaqstan Tashkent qalasınan keyin ekinshi orındı iyeledi.
Bul ózgerislerde turaqlı energiya támiynatı áhmietli orın ielemekte. Keyingi jıllarda 860 megavattlı jańa quwatlıqlar iske qosıldı. Beruniy hám Qaraózekte samal stanciyalarınıń qurılısı esabınan "jasıl" energiya úlesi 23 procentke jetti. Elektr islep shıǵarıw 4 esege artıp, 5 milliard 330 million kilovatt-saattı quradı.