Qaraqalpaqstan Respublikası Nókis qalası hákimligi

Nókiske muhabbat beriń, mehir kórsetiń
​
Ádette biz jámiyetten hám átirapımızdaǵılardan tek ǵana miyirmanlıq, adamgershilik kútemiz. Hámmemiz súyikli hám súykimli bolıp jasawdı qáleymiz. Biraq, kóbinese ózimiz kimgedur mehir beriwdi umıtıp qoyamız. Insanlar sıyaqlı tábiyat ta, ana qalamız Nókis te bizden mehir kútedi.
​Keyingi waqıtları sociallıq tarmaqlarda ayırım adamlar Nókiste ámelge asırılıp atırǵan iygilikli islerden tek kemshilik izlewge berilip ketkendey. 
Geyde bir nárseni umıtıp qoyamız. Qalamız geografiyalıq jaylasıwdan, bálent imaratlardan, kóp kvartiralı turaq-jaylardan quralǵan mákan emes. 
Nókis - biziń nápesimiz, úyimiz ǵoy. Qalanıń kórinisi, turmısı onda jasap atırǵan adamlardıń ishki dúnyası hám mádeniyatınıń aynası bolıp esaplanadı.
 Sonda da, Nókis óziniń gózzal kelbeti menen jańalanıwlarǵa júz tutıp, xalqımızǵa mehirli qushaǵın ashpaqta.

Húrmetli Prezidentimiz tárepinen jolǵa qoyılǵan reformalar, qala hám awıllarımızdı abadanlastırıw, insan qádiri ushın, «Búgin bárshemizdiń baxıtlı jasawımızǵa, párawan ómir súriwimizge haqlımız »degen iygilikli siyasattıń ámeliy sáwleleniwin búgingi kúnde hár bir aymaqta, hár bir máhállede ayqın kóriwimiz múmkin.
​Búgin Nókis qalası hákimi Abat Daniyarov tiyisli mákeme hám shólkemlerdiń basshıları menen birgelikte paytaxtımızdaǵı «Hásretli ana» hám «Vatanparvar» mádeniy-demalıw parklerinde boldı. Maqset, aldaǵı abadanlastırıw jumısları boyınsha pikir almasıw hám másláhátlesiw.
​Maǵlıwmat ornında atap ótiw orınlı, Ekinshi jer júzilik urıs qatnasıwshıları esteligine baǵıshlanǵan «Jeńis» monumenti 1967 -jıl, al «Hásretli ana» monumenti 2001-jıl, 2014-jılı qayta qurılǵan edi. 1,5 gektar maydandı iyelegen «Vatanparvar» demalıw ornı bolsa 2021-jılı paydalanıwǵa tapsırılǵan.

 Quwanıshlısı, «Baslamalı byudjet»tiń 2026-jılǵı 2-máwsiminde «Shıǵıs» MPJ turǵınları usı aymaqtı abadanlastırıw tańlawında jeńimpaz bolǵan.
​Qala hákiminiń búgingi saparı da usı dóretiwshilik jumıslarına baǵıshlandı. Maydandaǵı abadanlastırıw ilajların joqarı arxitekturalıq dizaynda ámelge asırıw, piyadalar jolların hám «Eslew kitabı»n zamanagóy kóriniske keltiriw boyınsha arxitektor hám joybarlawshılar menen keńesildi. Ushırasıwda mashqalalı máselelerdi sheshiw hám sapalı ózgerisler jasaw boyınsha taraw basshılarına anıq tapsırmalar berildi.
​​Jaqın aylar ishinde Prezidentimiz baslamaları hám xalqımızdıń awızbirshiligi menen jańalanatuǵın maydanda qalamız miymanları hám turǵınları ushın zamanagóy, sonday-aq qolaylı demalıs mákanına aylanadı.

Elmira Sagalatdinova