Ǵárezsizlik bayramı qarsańında Qaraqalpaqstanda 12 iri obekt iske túsirildi
2026-08-25 12:00:00 / Jańalıqlar
Ǵárezsizlik bayramı qarsańında Qaraqalpaqstanda 12 iri obekt iske túsirildi
Húrmetli Prezidentimiz Shavkat Mirziyoevtiń qatnasıwında mámleketimiz ǵárezsizliginiń 35 jıllıǵı múnásibeti menen aymaqlarda ulıwma bahası 50 trillion sumlıq 163 jańa obektlerdi iske qosıw máresimi bolıp ótti.
Ilajda mámleketimiz basshısı aymaqlardaǵı studiyalarǵa jıynalǵan keń jámiyetshilik wákillerin, olar arqalı pútkil xalqımızdı jaqınlasıp kiyatırǵan ullı bayram menen qutlıqladı.
Onda Nókis qalasındaǵı jańadan rekonstrukciya qılınǵan Turan stadionınan Qaraqalpaqstan Respublikası Joqarǵı Keńesiniń Baslıǵı Amanbay Orınbaev, keń jámiyetshilik wákilleri videobaylanıs arqalı qatnastı.
Atap ótiw orınlı, búgin mámleketimiz basshısı rámziy túymeni basıp, 72 iri investiciyalıq joybar jáne 91 sociallıq taraw obekti paydalanıwǵa tapsırıldı.
Sonnan, Qaraqalpaqstanda da jámi 12 obekt, sonıń ishinde 117 mlrd. sum qarjı esabınan jańadan rekonstrukciyalanǵan Turan futbol stadionı, 3,1 trln. sumlıq 200 megavattlı samal elektr stanciyası hám 100 megavattlı energiya saqlaw sisteması, 153 mlrd. sumlıq Qaraqalpaqstan ilimiy-ámeliy medicina akademiyası, 12 mln. dollarlıq hák islep shıǵarıw zavodı, xalıqaralıq finans institutları tárepinen qarjılandırılıp, 167,7 mlrd. sum esabınan rekonstrukciyalanǵan Manǵıt suw tazalaw obekti, Nókis qalasında 15 mln. dollarlıq gazoblok islep shıǵarıw kárxanası, Kegeylide 4 mln. dollarlıq DVP ónimlerin islep shıǵarıwdı shólkemlestiriw joybarı sıyaqlı obektler iske túsirildi.
Bunnan tısqarı, Nókis rayonı aymaǵında 60 mlrd. sumlıq qusshılıq kompleksi, Ullı Britaniyanıń 3,3 mlrd. sumlıq Pearson Btec xalıqaralıq bilimlendiriw baǵdarlaması joybarı, Nókis qalasında 21 mlrd. sumlıq zamanagóy jeke menshik mektep, Taqıyatas rayonındaǵı 8,5 mlrd. sum esabınan jańadan qurılǵan 23-sanlı ulıwma bilim beriw mektebi, Shımbay rayonında 13,4 mlrd. sumlıq jańa mektepke shekemgi bilimlendiriw shólkemi paydalanıwǵa tapsırıldı.
Álbette, paydalanıwǵa tapsırılǵan obektler xalqımız iygiligi jolında uzaq jıllar dawamında xızmet etedi.