Qaraqalpaqstan Respublikası Nókis qalası hákimligi

Rekord nátiyje: Nókis qalasında 153 pitkeriwshi altın medal iyesi boldı
Elimizde bilimlendiriw tarawında ámelge asırılıp atırǵan keń kólemli reformalar óziniń ámeliy nátiyjelerin bermekte. Prezidentimizdiń baslaması hám turaqlı itibarı sebepli ulıwma orta bilimlendiriw sisteması sapa jaǵınan jańa basqıshqa kóterilip, jas áwladtıń zamanagóy bilim alıwı, óz qábiletin tolıq kórsetiwi ushın keń imkaniyatlar jaratılmaqta.
Bunday reformalardıń ayqın nátiyjeleri Nókis qalası mısalında da ayqın kózge taslanbaqta. Búgingi kúnde qalada 55 ulıwma orta bilim beriw mektebi jumıs alıp barıp, olarda mıńlaǵan oqıwshılarǵa sapalı tálim-tárbiya berilmekte.
2025-2026-oqıw jılı juwmaqlarına bola, qaladaǵı ulıwma bilim beriw mekteplerin 5647 oqıwshı tabıslı tamamladı. Olardıń arasında 153 pitkeriwshi altın, 9 pitkeriwshi gúmis medal menen sıylıqlandı. Bul kórsetkish ótken oqıw jılına salıstırǵanda sezilerli ósiwdi quradı. Sonıń ishinde, 2024-2025-oqıw jılında 166 pitkeriwshi altın medal menen sıylıqlanǵan bolsa, bıyıl da joqarı nátiyjeler saqlanıp, qala bilimlendiriw sistemasınıń izbe-iz rawajlanıp atırǵanı jáne bir márte tastıyıqlandı.
Sonday-aq, 189 pitkeriwshi elimiz hám sırt ellerdegi abıraylı joqarı bilimlendiriw mákemelerine múddetinen aldın student bolıw baxtına miyasar boldı. Bul bolsa jaslardıń bilimge bolǵan umtılısı, muǵallimlerdiń pidákerlik miyneti hám ata-analardıń qollap-quwatlawınıń nátiyjesi bolıp esaplanadı.
Búgin Nókis qalası hákimliginde pitkeriwshilerdi sıylıqlaw máresimi bolıp ótti. Onda qala hákimi A.Daniyarov altın medal iyelerine mámleketlik sıylıqlardı saltanatlı túrde tapsırdı.
Ilaj dawamında qala hákimi pitkeriwshiler menen qızǵın pikirlesip, olardı ómirindegi áhmiyetli basqısh - ǵárezsiz turmısqa qádem qoyǵanı menen qızǵın qutlıqladı. Ol óz sózinde elimizdiń rawajlanıwı bilimli, watansúygish, joqarı mánawiyatlı, intaker hám pidayı jaslar menen tıǵız baylanıslı ekenin atap ótip, jaslardı ielegen bilim hám potencialın Watan rawajlanıwı, xalıq abadanlıǵı jolında jumsawǵa shaqırdı.
Búgingi kúnde Nókis qalası pitkeriwshileriniń qolǵa kirgizip atırǵan joqarı nátiyjeleri elimizde bilimlendiriwge qaratılıp atırǵan joqarı itibardıń, ustazlardıń miyneti hám jaslardıń bilimge bolǵan qumarlıǵınıń ayqın kórinisi bolıp esaplanadı. Bul jetiskenlikler keleshekte de qala bilimlendiriw sisteması jáne de joqarı sheklerdi iyelewine isenim oyatadı.