Qaraqalpaqstan Respublikası Nókis qalası hákimligi

Mashqaladan sheshimge shekemgi jollar

Máhállelerdi sociallıq jaqtan salamatlandırıwdıń bas formulası zárúr sharayatlardı jaratıw bolıp tabıladı. Bul baǵdarda qalada sezilerli qádemler taslanbaqta. Atap aytqanda, "Jayxun" máhállesinde 1,5 km, "Jipek jol" MPJda 2 km hám "Jańa zaman" MPJda 1,9 km ishki jollarǵa zamanagóy asfalt tóseldi. Sonday-aq, "Jańa zaman" aymaǵında 3,1 km taza ishimlik suwı tarmaǵın tartıw jumısları qızǵın dawam etpekte.

Xalıqtıń bántligin támiyinlewde "Joybar-maqsetli kózqaras" sisteması iske qosılıp, tórt máhálleniń ózinde júzlegen puqaralar ózin-ózi bánt etti hám kishi mikrojoybarlar arqalı jumısqa jaylastı. "Jayxun"da jumıs baslaw aldında turǵan "Eko tekstil" joybarı 35 jaslardı  turaqlı jumıs ornı menen támiyinleydi.

Máhálle "jetiligi" hám sociallıq xızmetkerlerdiń mánzilli járdemi nátiyjesinde "Jayxun" MPJda kámbaǵal shańaraqlardıń sanı 292 den 190 ǵa, "Jańa zaman"da bolsa 96 dan 50 ge azaydı. Mámleket támiynatındaǵı shańaraqlarǵa azıq-awqat, kiyim-kenshek hám suw filtrleri jetkerip berildi. Awır kategoriyadaǵı jaslardıń basshılarǵa atalıqqa biriktiriliwi de óz nátiyjesin bermekte. "Jayxun" máhállesinde atalıqqa alınǵan 14 jumıssız jaslardıń on biri qısqa waqıtta kásip-ónerge oqıtıldı, turaqlı jumısqa jayǵastırıldı hám isbilermenlik jumısı ushın jeńilletilgen kreditler ajıratıldı. "Jaslar dápteri" arqalı studentlerdiń shártnama pulları tólengeni hám zárúr ásbap-úskeneler alıp berilgeni olardıń jámiyette óz ornın tabıwına bekkem kepillik bolıp esaplanadı.

Rásmiy emes bántlikti azaytıwda jazalaw emes, al xoshametlew mexanizmi tańlandı. Nátiyjede, waqtınsha qıyınshılıqqa ushıraǵan kárxanalardıń jumısı qayta tiklendi. Tek ǵana "Jipek jolı" hám "Nurlı bostan" máhálleleriniń ózinde onlaǵan isbilermenlik subektlerinde miynet etip atırǵan jumısshılardıń jumısı nızamlastırılıp, olar ushın kepillengen pensiya hám sociallıq qorǵaw sisteması jaratıldı.