"Keyin isleymiz" emes, dál házir hám usı jerde nátiyje kórsetiw
2026-04-04 17:00:00 / Jańalıqlar
"Keyin isleymiz" emes, dál házir hám usı jerde nátiyje kórsetiw
Nókis qalasında xalıqtıń turmıs dárejesin jaqsılawǵa qaratılgan jáne bir iri jumıslar baslanbaqta.
Prezidentimiz baslaması menen ámelge asırılıp atırǵan "Zarbdor" tájriybesi tiykarında qala orayındaǵı "Doslıq" máhállesi jaqın kúnlerde qurılıs hám abadanlastırıw jumısları menen túp-tiykarınan jańartıladı.
Baslı maqsetlerdiń biri jıllar dawamında jıynalıp qalǵan mashqalalardı tez arada sheshiw hám adamlar ushın qolaylı sharayat jaratıwdan ibarat.
Usı múnásubet penen Nókis qalası hákimi A.Daniyarov jurnalistler hám blogerler ushın prezentaciya ótkerip, rejelestirilgen jumıslar hám tiykargı baǵdarlar haqqında maǵlıwmat berdi.
Prezentaciyada atap ótilgenindey, máhálle aymaǵında uzınlıǵı 1,2 kilometr bolǵan zamanawıy seyilgáh qurıladı. Bul máskan xalıqtıń mazmunlı dem alıwına xizmet etiwi menen birge, dúnyáǵa belgili I.V. Savickiy atındaǵı mámleketlik kórkem óner muzeyi menen baylanısadı. Bul bolsa qalanıń mádeniy tartımlılıǵın ele de arttırıwı gúmansız.
Sonday-aq, bul aymaq "Xalıqlar doslıǵı'' máhállesinde qurılısı jedel dawam etip atırǵan "24/7'' kóshesi menen tutasadı. Nátiyjede paytaxtımızda bir-birine shınjırlı túrde jalǵanǵan keń kólemli seyil hám dem alıw sisteması payda boladı.
Ilajda Qaraqalpaqstan Respublikası Ministrler Keńesiniń Baslıǵı Farxod Ermanov qatnasıp, proceske unamlı baha berdi hám óziniń jılı pikirlerin bildirdi.
Kórgezbeli tanıstırıwda jurnalistler ózlerin qızıqtırǵan barlıq sorawlarına juwap aldı. Barlıq jumıslar ashıq-aydın hám sháppáń tárizde alıp barılıwı atap ótildi.