Qaraqalpaqstan Respublikası Nókis qalası hákimligi

Nókiske qayırlı qádem menen kirip kelgen "Zarbdor tájiriybesi"

Nókis qalasında máhálle  sistemasın jańa basqıshqa alıp shıǵıwǵa qaratılǵan keń kólemli jumıslar baslanbaqta. Mámleket basshısınıń aymaqlardı abat etiw, máhállelerdi kompleksli rawajlandırıw boyınsha bergen tapsırmalarınıń orınlanıwı sheńberinde qalanıń "Órnek" hám "Doslıq" máhállelerinde jańa joybarlarǵa start beriliwi kútilmekte.
Hámmemizge belgili, Prezidentimizdiń atap ótkenindey, hár bir máhálle óz kórinisine hám ekonomikalıq drayverine ie bolıwı, xalıq bolsa reformalardıń nátiyjesin tikkeley óziniń kúndelikli turmısında seziwi kerek. Áne usı qatnas tiykarında Jizzaq wálayatı Zarbdor rayonında sınaqtan ótken aldınǵı tájiriybe endi Nókis qalasında da engiziliwi rejelestirilgen.
Usı múnásibet penen Nókis qalası hákimi Abat Daniyarov "Órnek" hám "Doslıq" máhállelerine barıp, orınlarda úyreniw jumısların alıp bardı.Sapar etiw dawamında tek ǵana jaǵday tallanıp qoymastan, al ámeliy ilajlar rejesi ózine tán "jol kartası" qáliplestirildi.
Qala hákimi basshılıǵındaǵı jumısshı topar quramında arxitektorlar, joybarlawshılar, injenerler hám ekologlar qatnastı. Olardıń aldına máhállelerdi ekonomikalıq hám sociallıq jaqtan rawajlandırıw, xalıq ushın qolaylı infrastruktura jaratıw boyınsha anıq wazıypalar qoyıldı.
Joybarǵa muwapıq, bul aymaqlarda zamanagóy qıyabanlar, dem alıw orınları jáne sawda hám xızmet kórsetiw obektleri qurıladı. Baǵlardıń átirapında kishi biznes hám isbilermenlik subektleri ushın imkaniyatlar jaratılıp, jańa jumıs orınlarınıń shólkemlestiriliwi rejelestirilmekte.
Qánigelerdiń atap ótiwinshe, bul qatnas máhállelerdi tek abat aymaqqa emes, al ekonomikalıq belsendi noqatqa aylandırıwǵa xızmet etedi. Bul bolsa xalıqtıń dáramatların arttırıw, turmıs sapasın jaqsılawǵa tiykar jaratadı.
Atap ótiw orınlı, bunday ámeliy jumıslar arqalı reformalar máhálleniń ishine tereń kirip barmaqta.