JANALIQLAR
2026-03-06 10:00:00 / Jańalıqlar
Qala prokurorınıń múrájatı
Húrmetli puqaralar!
Respublikamızda basqa aymaqlarda bolǵanı sıyaqlı júz berip atırǵan jınayatlardıń kópshilik bólegin urlıq, aldawshılıq hám jol transport hádiyseleri jınayatları quraydı.
Ótken jılı júz bergen urlıq jınayatlardıń yarımınan kóbi puqaralarımız óz mal-múlklerin qarawsız qaldırıp, sharayat jaratqanı aqıbetinde júz bergen.
Sol sebepli, xalıq kóp jasaytuǵın orınlar hám kóp qabatlı úyler átirapında viktimologiyalıq ilajlar ótkerilip, 10 mıńnan aslam qarawsız qaldırılǵan múlkler anıqlanıp hám iyelerine eskertilgen halda qaytarıldı.
Ásirese, kóp qabatlı turaq jaylardıń esik aldında mal-múlkleriniń qarawsız qaldırılıwı aqıbetinde urlıq jınayatı artpaqta.
Sol sebepli, mal-múlkińizge abaylı bolıń, itibarsızlıǵıńız yamasa biypárwalıǵıńız sebepli jınayat qurbanına aylanıp qalmań.
Húrmetli puqaralar!
Keyingi waqıtlarda júz berip atırǵan jınayatlardıń derlik teń yarımın kibermákanda júz berip atırǵan jınayatlar quramaqta. Álbette, puqaralarımızdı kiber qáwiplerden qorǵaw, usı tarawǵa zamanagóy programmalıq-texnikalıq sheshimler
hám jańasha jumıs usılların engiziw boyınsha kompleks
ilajlar kórilmekte.
Biraq, hár birimiz ózimizde bul túrdegi jınayatlarǵa
qarsı immunitet payda etpesek gózlengen nátiyjege erisip bolmaydı.
Tallawlarǵa qaraǵanda, puqaralarımız itibarsızlıq yamasa ańsat pul tabıw niyetinde internet tarmaqları arqalı
kelgen hár qıylı fayllardı yamasa siltemelerdi ashıw nátiyjesinde ózleriniń jeke maǵlıwmatların kiber-mákandaǵı jınayachılarǵa usınıp, olardıń ańsat
menen pulların qolǵa kirgiziliwine jol ashıp berilmekte.
Húrmetli watanlaslar!
Pursattan paydalanıp ulıwma jınayatlar ishinde salmaǵı joqarı bolǵan avtoavariyalarǵa itibarıńızdı qaratpaqshıman.
2025-jıldıń 12 ayında 142 jaǵdayda jol háreketi qáwipsizligi hádiyseleri menen baylanıslı jınayatlar islenip, 2024-jıldıń usı dáwirine salıstırǵanda 16,4 procentke azayǵan.
Biraq, aydawshılardıń jol háreketi qaǵıydalarına itibarsızlıǵı aqıbetinde biygúna 10 adam ómirden mezgilsiz qaytıs boldı, 132 adam hár qıylı dárejedegi dene jaraqatların alǵan.
Qádirli watanlaslar!
- jámiette qáwipsiz ortalıqtı támiyinlew jumıslarına bárshemiz birdey juwapkershilik penen qatnas jasasaq;
- óz úyimiz, óz máhállemiz, óz jurtımızdıń tınıshlıǵı hám tatıwlıǵına tiyisli ekenligimizdi tereń sezinsek;
- jámiette huqıqıy mádeniyattı qáliplestiriw, ruwxıy-ádep-ikramlılıq qádiriyatlardı bekkemlewge hár birimiz óz úlesimizdi qossaq shańaraǵımız, máhállemiz, elimiz tınısh hám paraxat mákanǵa aylanadı.
Húrmet penen qala prokurorı Ravshan Bauaddinov