Máhállede endi “segizlik” xızmet
2026-03-06 15:00:00 / Jańalıqlar
Máhállede endi “segizlik” xızmet
Húrmetli Prezidentimizdiń baslaması menen xalqımızdı hám aymaqlarımızdı ayrıqsha jaǵdaylardan isenimli qorǵaw tarawın túp-tiykarınan reformalaw maqsetinde 2025-jıl 20-oktyabr kúni úsh áhmietli hújjet 185-sanlı Párman, sonday-aq, 310 hám 311-sanlı qararları qabıl etildi.
Bul hújjetler tiykarında sistemada jańa wazıypalar belgilep alındı hám ayrıqsha jaǵdaylardıń profilaktikasın jáne de nátiyjeli shólkemlestiriwge qaratılǵan keń kólemli jumıslar ámelge asırılmaqta.
Sonıń ishinde, Nókis qalasındaǵı 71 máhállede aldınǵı jılları jámi 4 profilaktika inspektorı jumıs alıp barǵan bolsa, ámelge asırılǵan reformalar nátiyjesinde hár 4 máhállege birewden mámleketlik inspektor lawazımı engizildi hám 2026-jıldan baslap olardıń jumısı tolıq jolǵa qoyıldı.
Bugingi kúnde máhállelerde qáwipsizlikti támiyinlewge qaratılǵan "Máhálle kesiminde" hám "Shańaraq kesiminde" jumıs islew sisteması ámeliyatqa engizildi. Bul processte máhálle jetiligi belsene qatnaspaqta.
Hurmetli Prezidentimizdiń 310-sanlı qararına tiykarlanıp, máhállelerde ayrıqsha jaǵdaylar profilaktikasın mánzilli shólkemlestiriw hám onı nátiyjeli ámelge asırıw maqsetinde "Máhállemizdi ayrıqsha jaǵdaylardan qorǵalǵan aymaqqa aylandıramız!" súreni astında "profilaktika -qorǵanıw" principi boyınsha shólkemlestiriw mexanizmleri engizildi.
Bul sistemaǵa bola, qáwip indikatorları tiykarında hár bir máhálle "qızıl," "sarı" hám "jasıl" kategoriyalarǵa ajıratılǵan.
Sonday-aq, máhálle binálarında mámleketlik inspektorlardıń "Máhálle qorǵaw" xızmet bólmelerin shólkemlestiriw boyınsha da unamlı jumıslar ámelge asırılmaqta.
Nókis qalasındaǵı 71 máhálleniń 17 sinde tolıq "Máhálle qorǵaw" xızmet bólmeleri ajıratıldı, al, qalǵan máhállelerdiń imaratlarında bolsa, mámleketlik inspektorlar ushın arnawlı "jumıs stolı" shólkemlestirilgen.
Qalamızda 17 máhállede shólkemlestirilgen "Máhálle qorǵaw" xızmet bólmeleriniń materiallıq-texnikalıq bazasın bunnan bılay da bekkemlew, mámleketlik inspektorlar ushın qolaylı jumıs sharayatların jaratıw maqsetinde kompyuter texnikaların tapsırıw ilajı bolıp ótti.
Ilajda qala hákimi A.Daniyarov, zamanagóy texnika quralların máhállelerde profilaktika jumısların jáne de nátiyjeli alıp barıwǵa, xalıqtı ayrıqsha jaǵdaylardan qorǵaw boyınsha jumıslardıń sapasın arttırıwǵa xızmet etetuǵınına isenemiz,-dedi.