JANALIQLAR
2025-12-29 12:05:00 / Jańalıqlar
Nókis qalasında jámietlik transport infrastrukturası jetilistirilmekte!
Nókis qalasında jámietlik transport xızmetleriniń sapasın arttırıw maqsetinde "Sapsan Trans Nukus" juwapkershiligi sheklengen jámieti tárepinen Qıtay Xalıq Respublikasınan ulıwma bahası 24 milliard sum bolǵan 12 dana elektrobus alıp keliw rejelestirilgen.
Usı joybar sheńberinde 4 dana elektrobus Nókis qalasına jetkerip berilgen, qalǵan 8 dana transport quralınıń alıp keliniwi jaqın kúnlerde ámelge asırılıwı belgilengen. Házirgi waqıtta alıp kelingen elektrobuslar boyınsha belgilengen tártipte bajıxana rásmiylestiriwi processleri ámelge asırılmaqta.
Sonıń menen birge, Ózbekstan Respublikası Prezidentiniń tapsırmasına muwapıq, Nókis qalasına jámi 200 dana avtobus alıp keliw belgilengen bolıp, usı tapsırmanıń orınlanıwın támiyinlew maqsetinde juwapker shólkemler tárepinen arnawlı avtotransport quralların satıp alıw hám alıp keliw boyınsha tiyisli ilajlar kórilmekte.
Bul jumıslar qala xalqı ushın qolaylı, zamanagóy hám ekologiyalıq jaqtan qáwipsiz jámietlik transport sistemasın qáliplestiriwge xızmet etedi.