JANALIQLAR
2025-11-29 17:00:00 / NUKUS SHAHRI HOKIMLIGI
1-dekabr - Qaraqalpaq tiline mámleketlik til biyligi berilgen kún
Bıyıl qaraqalpaq tiline mámleketlik til biyligi berilgenine 36 jıl tolıwına baylanıslı bayram ilajları respublikamız boylap keń tárizde belgilenbekte. Búgin xalqımızdıń ruwxıy turmısında sheksiz orın ieleytuǵın, milliy ózligimiz hám ádebiy miyrasımızdıń tiykarı bolǵan Qaraqalpaq tili bayramın joqarı ruwxta hám úlken maqtanısh penen belgilenbekte.
Hár bir millettiń ana tili – sol millettiń ar-namısı, hújdanı, milliy qádiriyatları menen biybaha ruwxıy baylıǵı bolıp esaplanadı. Ata-babalarımızdan miyras bolıp qalǵan bul muqaddes tildi qásterlep saqlaw, onıń abırayın arttırıw, keyingi áwladqa taza hám sap halında jetkeriw tek ǵana ustazlardıń jumısı bolıp qalmastan, pútkil jámietshiliktiń minnetli wazıypasına aylanıwı tiyis.
Usı múnásibet penen qala hákimligi de baslama kóterip, jıldaǵıdan ózgeshe bolsın degen maqsette eki kún dawamında muǵallimler arasında "Ana tilim- sen basqadan ayıramam!" atamasında shıǵarmalar tańlawın shólkemlestirgen edi.
Usı jıldıń 28-noyabr kúni Qaraqalpaq mámleketlik jaslar teatrında qala hákiminiń orınbasarı J.Otejanov,qala hákiminiń mámleketlik til máseleleri boyınsha másláhátshisi B.Abdreymov, qalalıq ruwhıylıq-aǵartıwshılıq bólimi bаslıǵı Q.Nuratdinovlar qatnasıwında tańlawda jeńimpaz bolǵan muǵallimler xoshametlendi. Ilaj kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.