MEMORANDUM
2025-11-25 17:00:00 / NUKUS SHAHRI HOKIMLIGI
Nókis qalasında jańa oqıw jılı baslanıwı menen-aq jaslardı mádeniy-ruwxıy processlerge jáne de keńnen tartıwǵa qaratılǵan jumıslar jańa basqıshqa kóterildi. Qala hákimliginiń baslaması menen búgingi kúnde Nókis qalası hákimligi, qalalıq Mektepke shekemgi hám mektep bilimlendiriwi bólimi, Berdaq atındaǵı Qaraqalpaq mámleketlik akademiyalıq muzıkalı teatrı hám
Qaraqalpaq mámleketlik Jas tamashagóyler teatrı arasında gezektegi birge islesiw memorandumına qol qoyıldı.
Bul memorandum jańa oqıw jılınıń baslanıwı menen engizilgeni menen áhmieti jáne de arttı. Joybar sheńberinde usı jıldıń basınan berli 20 mıńnan aslam mektep oqıwshıları teatr tamashalarına tartıldı. Olardıń kórkem ónerge qızıǵıwshılıǵın hám intellektuallıq rawajlanıwın qollap-quwatlaw maqsetinde, oqıw baǵdarlamalarına sáykes ilajlar shólkemlestirildi.
Sonday-aq, hákimliktiń baslaması menen kem támiyinlengen hám járdemge mútáj shańaraqlardıń perzentlerin qamtıp alıw boyınsha ayrıqsha ilajlar ámelge asırıldı. Olar ushın jeńilletilgen hám biypul teatr tamashaları qoyıp berildi. Hár bir bala kórkem óner dúnyasın seziniwi ushın barlıq sharayatlar jaratıldı.
Baslamanıń bas maqseti
jaslardıń ruwxıy dúnyasın bayıtıw, olardı teatr kórkem óneri arqalı rawajlandırıw hám joqarı qádiriyatlarǵa húrmet sezimin qáliplestiriw bolıp tabıladı.
Usı tárizde jańa oqıw jılı Nókis qalasında jaslar mánawiyatın qollap-quwatlaw hám dóretiwshilik ortalıqtı keńeytiwge qaratılǵan áhmietli ámeliy qádemler menen baslandı.