Tashkent xalıqaralıq investiciya forumına tayarlıq kórip shıǵıldı

Bul forum elimizdiń investiciyalıq potencialın keńnen kórsetiw, sırt elli sherikler menen óz-ara paydalı joybarlardı qáliplestiriw hám alǵa qoyıw ushın áhmiyetli xalıqaralıq maydanǵa aylanǵan.

2022-jılı birinshi márte ótkerilgen forumda 56 mámleketten 1 mıńnan aslam sırt el miymanı qatnasqan edi. Usı jılı 16-18-iyun kúnleri bolıp ótetuǵın besinshi Tashkent xalıqaralıq investiciya forumında 99 mámleketten jámi 8 mıńnan aslam qatnasıwshı, sonıń ishinde, derlik 3,1 mıń sırt el miymanı qatnasıwı kútilmekte.

Ilajǵa mirát etilgenler arasında sırt mámleketler húkimetleriniń basshıları hám wákilleri, abıraylı xalıqaralıq finans institutları, iri kompaniyalar, investiciya qorları hám isbilermen toparlardıń basshıları bar.

Prezentaciyada forum hám onıń sheńberinde ótkeriletuǵın ilajlar baǵdarlaması haqqında maǵlıwmat berildi. Atap aytqanda, jalpı májilis, eki tárepleme ushırasıwlar, tarmaq hám aymaqlardıń prezentaciyaları, investiciyalıq kelisimlerge qol qoyıw máresimleri hám isbilermenlerdiń sóylesiwleri ótkeriledi.

Ózbekstannıń investiciyalıq potencialın kórsetiw kórgizbesinde awıl xojalıǵı, jeńil sanaat, geologiya, elektrotexnika sanaatı, mashina qurılısı, ximiya sanaatı, energetika, jasalma intellekt hám málimleme texnologiyaları tarmaqlarınıń imkaniyatları tanıstırılıwı rejelestirilgen.

Forum sheńberinde Prezidentimiz janındaǵı Sırt el investorları keńesiniń gezektegi jalpı májilisi de bolıp ótedi. Onda elimizde investiciyalıq ortalıqtı jáne de jaqsılaw, sanaat-texnologiyalıq hám innovaciyalıq rawajlanıwdı jedellestiriw, jeke menshik sektor hám xalıqaralıq investorlar ushın jáne de qolaylı sharayatlar jaratıw máseleleri dodalanadı.

Bıyılǵı forumda da investiciyalıq kelisimlerdiń iri toplamına qol qoyıw rejelestirilgen. Házirgi waqıtta jańa joybarlardı qáliplestiriw jumısları jedel alıp barılmaqta.

Islep shıǵılıp atırǵan kelisimler ximiya sanaatı, geologiya hám metallurgiya, jeńil sanaat, elektrotexnika hám mashina qurılısı, farmacevtika, awıl xojalıǵı, qurılıs materialları, energetika hám ekologiya, sanlı texnologiyalar, qurılıs hám infrastruktura, bank-qarjı, transport-logistika, turizm hám bilimlendiriw sıyaqlı áhmiyetli baǵdarlardı qamtıp aladı.

Bul joybarlardıń ámelge asırılıwı jańa jumıs orınların jaratıw, joqarı qosımsha qunlı ónimler islep shıǵarıw, eksport potencialın arttırıw, infrastrukturanı modernizaciyalaw hám aymaqlardıń investiciyalıq tartımlılıǵın kúsheytiwge xızmet etedi.

Mámleketimiz basshısı forumdı joqarı shólkemlestiriwshilik dárejede ótkeriw, hár bir tarmaq hám aymaqtıń investiciyalıq potencialın anıq joybarlar arqalı kórsetiw zárúr ekenligin atap ótti.

Juwapkerlerge sırt elli miymanlardı kútip alıw, ilajlar baǵdarlamasın puqta shólkemlestiriw, qol qoyılatuǵın kelisimlerdiń anıq orınlaw mexanizmlerin belgilew hám forumnan keyin olardı sistemalı monitoring etip barıw boyınsha tapsırmalar berildi.