Eksporttı kóbeytiw hám isbilermenler ushın jáne de qolaylı sharayatlar jaratıw máseleleri dodalandı

Ózbekstan 2030-jılǵa shekem eksport kólemin 45 milliard dollarǵa jetkeriwdi maqset etip qoyǵan. Bul kórsetkishke erisiw ushın dástúriy bazarlar menen sheklenbesten joqarı marjalı jańa bazarlarǵa shıǵıw zárúr.

Bul baǵdarda sırtqı bazarlardaǵı jetekshi tutınıw segmentleri hám joqarı talapqa iye ónimler boyınsha tereń tallaw ótkerildi. Nátiyjede qurılıs materialları, jeńil sanaat, elektrotexnika, azıq-awqat, turmıslıq ximiya, mashina qurılısı hám metallarǵa baylanıslı baǵdarlarda eksporttı jáne de arttırıw ushın elimizde úlken rezerv hám imkaniyat bar ekenligi anıqlandı.

Usı múnásibet penen prezentaciyada perspektivalı bazar esaplanǵan mámleketler menen jeńilletilgen sawdanı jolǵa qoyıw, sawda-ekonomikalıq qatnasıqlardı jedellestirip, eksport-import kóleminiń ósiwine sáykes túrde shegara ótkeriw punktleriniń infrastrukturası hám quwatlılıǵın keńeytiw zárúrligi atap ótildi.

Juwapkerler ónimlerimizdiń sırtqı bazarlarda iyelegen ornı, talap joqarı bolǵan tovar túrleri, sırt elli sherikler menen ámelge asırılıp atırǵan birge islesiw joybarları jáne eksporttı diversifikaciyalaw boyınsha orınlanıp atırǵan jumıslar boyınsha málimleme berdi. Bar potencialdan tolıq paydalanıw, jańa bazarlardı ashıw hám sırtqı sawda mexanizmlerin ápiwayılastırıw tapsırıldı.
Búgingi kúnde 81 mámleketlik uyım tárepinen isbilermenlerge 739 túrdegi xızmetler kórsetilmekte.

Biraq 576 túrdegi xızmetler tarqaq halda kórsetilgeni ushın isbilermenler hújjet jıynap, uyımnan-uyımǵa sergizdan bolıp atırǵanı kórsetip ótildi. Máselen, gósh ónimlerin islep shıǵarıw ushın 17 basqıshtan ótiw, 10 uyımǵa barıw kerek.

Sonıń menen birge, buxgalteriya, salıq, eksport hám sertifikatlaw boyınsha konsalting xızmetin kórsetetuǵın birden-bir jeke menshik servis maydanshası joq. Bunday xızmetlerdi bankler, qamsızlandırıw kompaniyaları, birja, brokerler hám logistika operatorları, biznes bilimlendiriw hám trening baǵdarlamaları menen integraciyalaw múmkin.

Prezentaciyada isbilermenler ushın barlıq mámleketlik hám jeke menshik xızmetlerdi bir jerge jámleytuǵın “Biznes sherik” orayların ashıw usınıs etildi.

Rejege bola, Sawda-sanaat palatası janında shólkemlestiriletuǵın oraylarda barlıq mámleketlik hám jeke menshik xızmetlerdi “bir ayna” principi tiykarında bir jerde, birden-bir elektron platforma arqalı kórsetiw jolǵa qoyıladı. Isbilermenlerdiń múrájatlarına kúni-túni juwap beretuǵın “koll-oray” da shólkemlestiriledi.

Prezidentimiz usınıstı maqullap, oray isbilermenlik subektin shólkemlestiriwden baslap, jumısın jolǵa qoyıw, tayar ónimlerdi satıw hám eksport etiwge shekemgi barlıq tarawlardı qamtıp alıwı zárúr ekenligin atap ótti. Juwapkerlerge bul boyınsha tiyisli tapsırmalar berildi.