Moynaqta 32-sessiya bolıp ótti
2026-03-28 19:55:00 / Jańalıqlar
Xalıq deputatları Moynaq rayonlıq Keńesiniń 32-sessiyasında aymaqtıń rawajlanıwı hám xalıqtıń áhmiyetli máselelerine qaratılǵan bir qatar aktual qararlar kórip shıǵıldı.
Xalıq deputatları Moynaq rayonlıq Keńesiniń 32-sessiyasında aymaqtıń rawajlanıwı hám xalıqtıń áhmiyetli máselelerine qaratılǵan bir qatar aktual qararlar kórip shıǵıldı. "Openbudget.uz" portalında jeńimpaz bolǵan usınıslardı qarjılandırıw hám jergilikli byudjettiń erkin qaldıq qarjıların nátiyjeli baǵdarlaw máseleleri dodalaw orayında boldı. Sonday-aq, infrastruktura hám sociallıq turaqlılıqtı támiyinlew qorı esabınan qarjı ajıratıw boyınsha usınıslar kórip shıǵıldı.
Sessiyada rayondaǵı qáwipsiz ortalıqtı bekkemlew, jınayatshılıq hám huqıqbuzarlıqlardıń aldın alıw baǵdarında ámelge asırılıp atırǵan jumıslar boyınsha juwapker shólkemler málimleme berdi. Prokuratura hám ishki isler bólimi tárepinen alıp barılıp atırǵan profilaktikalıq ilajlar, nátiyjeler hám keleshektegi rejeler hár tárepleme tallandı. Máhállelerde "Máhálle jetiligi" jumısı arqalı mashqalalardı ornında sheshiw mexanizmleri de ayrıqsha atap ótildi.
Bilimlendiriw hám sociallıq qorǵaw baǵdarındaǵı máseleler de sessiya kún tártibinen áhmiyetli orın aldı. Mayıplıǵı bolǵan, bilimlendiriw mákemelerine bara almaytuǵın balalardıń úyde jeke tártipte bilim alıwı hám olardı arnawlı ádebiyatlar menen támiyinlew jaǵdayı dodalandı. Ekologiya hám klimat ózgeriwi baǵdarında ámelge asırılǵan jumıslar boyınsha esabat tıńlanıp, qorshaǵan ortalıqtı saqlaw baǵdarındaǵı wazıypalar belgilep alındı.