Paydalı ádetler
2026-03-24 17:05:00 / Jańalıqlar
Ilimpazlar anaw yamasa mınaw ádetlerimiz ómirimizdi qanshelli qısqartıwı hám uzaytıwı múmkinligin anıq esaplaw ushın izertlewler alıp barıp, nátiyjede kútilmegen juwmaqqa keldi...
TAŃLAWSHÍLÍQ - deni saw adamlardıń ádeti.
Turaqlı túrde jumısqa keshigiw karyera, óz-ara múnásibetler, al geyde, perzentlerimizge de unamsız tásir kórsetedi. Mısalı, perzentinizdi mektepke yamasa baqshaǵa alıp barıwǵa keshiktińiz. Nátiyjeni analizlep kóriń.
Álbette, bunday jaman ádetler ómir dawamlılıǵına da óz tásirin tiygizbey qoymaydı. Keshikken adam hesh qáterjam bola almaydı, sebebi ol keshikpekte, ol asıǵadı. Onıń ashıwı shıqqanı, jol belgilerinen, transporttıń áste júrgeninen nalıǵanı kemindey, ol ózin kútip otırǵanlardıń da narazılıǵına ushıraydı. Angliyalı ilimpazlardıń atap ótiwinshe, bunday stress "turaqlı keshigiwshiler"diń ómirin 3 jılǵa qısqartadı eken.
Basınan baslawǵa hesh qashan kesh emes!
Paydalı ádetlerge úyreniw ushın hesh qashan kesh emes, dep esaplaydı Ullı Britaniyanıń Bat universitetiniń izertlewshileri. Olardıń anıqlawınsha, kúnine 25 minut waqtın fizikalıq háreket - tez júriw, velosipedte júriw, júziw menen shuǵıllanıwǵa ajıratatuǵın adamlar derlik emlewxanaǵa túspeydi hám kemnen-kem jaǵdaylarda shıpakerge múrájat etedi. Bul izertlewdiń eń ájayıp tárepi sonda, kórikten ótkenlerdiń ortasha jası - 78 jasta.
Hámme ashıq hawaǵa!
Shıǵıs Kaliforniya universiteti (AQSh) izertlewshileri 55 jastan asqan adamlardıń eslew, úyreniw hám intellektual potencialın bahalap, tómendegi juwmaqqa keldi: hár kúni ashıq hawada seyil etetuǵınlardıń aqılıy miynetke bolǵan imkaniyatları jaslıqtaǵıday saqlanıp qaladı.
Ulıwma alǵanda, paydalı ádetler hár tárepleme paydalı. Demek, olarǵa ie bolıwǵa hesh qashan kesh emes. Biraq, bul waqıttı ótkerip jiberiw kerek degeni emes.
Jumısqa yamasa bir jerge barıw ushın ádettegiden 15 minut aldın shıqsańız, stresstin ómirińiz minutların alıwına jol qoymagan bolasız.
Úsh jıl dawamında kúnine 25 minutlıq fizikalıq háreket 70 jastan asqanlardıń emlewxanaǵa jatıwın 2 esege azaytadı.
Hár kúni ashıq hawada seyil etiw tek ǵana júrek iskerligi hám teri reńi ushın emes, al eslew qábileti hám miy iskerligi ushın da júdá paydalı.
Aynash Maxambetaliyeva, Moynaq rayonı Medicina birlespesi Xirurgiya bólimi miyirbiykesi