Qaraqalpaqstan Respublikası Kegeyli rayonı hákimligi

Búgin Kegeyli rayonında Qaraqalpaqstan Respublikası Shańaraq hám hayal-qızlar komiteti hám Respublikalıq Ishki isler ministrliginiń baslaması menen hayal-qızlar arasında jınayatshılıq hám huqıqbuzarlıqlardıń aldın alıwǵa qaratılǵan respublikalıq forum bolıp ótti.

"Maqsetlerdi haqıyqatqa aylandır" súreni astında ótkerilgen bul ilajdan gózlengen tiykarǵı maqset - Kegeyli rayonındaǵı unamlı tájiriybeni jaratıw hám onı keńnen en jaydırıwdan ibarat.

Forumda rayon hákimi A.Kamalov qatnasıp, óziniń shıǵıp sóylegen sózinde hayal-qızlar arasındaǵı jınayatshılıqtıń aldın alıw baǵdarında ámelge asırılıp atırǵan jumıslarǵa toqtap ótti. Ilaj dawamında rayondaǵı jaǵdaylar tallanıp, jınayatshılıq dárejesiniń tómenligi ayrıqsha atap ótildi.

Sonday-aq, jámiyetlik jumıslarda belsene qatnasıp kiyatırǵan hayal-qızlar sıylıqlandı hám ilaj sheńberinde mádeniy baǵdarlama kórsetildi. Respublikadan kelgen miymanlar oraylıq kitapxanada qábiletli jaslar menen ushırasıw ótkerdi.

Bul forum aymaqlarda sociallıq turaqlılıqtı támiyinlew, hayal-qızlardı qollap-quwatlaw hám olardıń jámiyettegi belsendiligin arttırıwda úlken áhmiyetke iye boldı.