Kegeyli rayonı Ishki isler bólimi baslıǵı M.R.Sherimbetovtıń xalıqqa múrájatı
2026-02-06 20:45:00 / Министрлик
Assalawma áleykum, húrmetli rayon turǵınları!
Húrmetli Prezidentimizdiń baslamaları hám tikkeley basshılıǵında barlıq tarawlarda keń kólemli reformalar ámelge asırılmaqta.
Prezidentimiz mine usı jańalanıw, ózgerislerdiń nátiyjeli bolıwınıń kepili sıpatında mámlekette tınıshlıq hám tatıwlıqtı támiyinlew, onıń ushın jınayachılıqqa qarsı gúresiw sistemasın túp-tiykarınan jaqsılawdı mámleketlik siyasattıń eń tiykarǵı baǵdarlarınan biri dárejesine kóterdi hám ámeliy jumıslarǵa kiristi.
"Jańa Ózbekstanda huqıqbuzarlıq hám jınayachılıqqa qarsı gúresiw mine usınday ulıwma milliy áhmietke ie wazıypaǵa aylandırıldı.
Áziz puqaralar, Sizlerge huqıqbuzarlıqlar hám jınayatlardıń aldın alıw boyınsha dáslepki, orınlanǵan jumıslar hám tallawlar nátiyjeleri boyınsha málimleme bermekshimen.
Rayonda tınıshlıqtı-tatıwlıqtı támiyinlew jınayatlardıń sebeplerin "máhálle kesiminde," "shańaraq kesiminde" hám "puqara kesiminde" dodalaw tártibi, máhállelerdi kriminogen dárejede klassifikaciyalaw sisteması, "máhálle jetiligi" institutı, "sociallıq profilaktika" principi tiykarında huqıqbuzarlıqlar profilaktikasın ámelge asırıw ámeliyatı sheńberinde xalıqta qáwipsizlik sezimin qáliplestiriw baǵdarında bir qatar nátiyjeli ilajlar ámelge asırılmaqta.
Ózbekstan Respublikası Prezidentiniń 2026-jıl 5-yanvar kúngi PQ-1-sanlı Qararı menen hár bir máhállede huqıqbuzarlıqtıń erte aldın alıw, kriminogen jaǵdaydı turaqlastırıw boyınsha jańa mexanizm engizilip, máhállelerde "úlgili qáwipsiz kóshe"ler shólkemlestirilmekte.
Máhállelerge ornatılǵan kameralar járdeminde izlewdegiler hám jınayatlar "ıssı izi" menen ashılmaqta.
Rayonda kriminogen jaǵday awır máhállelerdiń jınayat oshaqları ornına shıǵıp úyrenilmekte, máselen rayonda jınayatlardıń sebepleri tallanıp, zárúr ilajlar belgilengenligi nátiyjesinde rayonda ulıwma jınayatlar
6 dan 6 ǵa turaqlılıǵı támiyinlengen bolsa, máhállede aldın alıwı múmkin bolǵan jınayatlar 3 ten 2 ge (50 procent) azayıwına erisildi.
Nátiyjede rayon aymaǵında qastan adam óltiriw, awır dene jaraqatın jetkeriw, basqınshılıq, tonawshılıq, transport quralın alıp qashıw hám adam sawdası sıyaqlı jınayatlardıń júz beriwine jol qoyılmadı.
Keyingi waqıtlarda aldın dus kelmegen kiberjınayatlar salmaǵınıń artıwı qatań shólkemlestiriw ilajların kóriwdi talap etpekte.
Usı jıldıń yanvar ayı dawamında islengen ulıwma jınayatlardıń 16,6 procentin málimleme texnologiyaları tarawındaǵı jınayatlar quraydı. Sońǵı jılları bul kategoriyadaǵı jınayatlar, bir neshe esege kóbeydi.
Keleshekte jınayatlar qurbanı bolıp qalmawıńız ushın:
- aldawshılıq penen shuǵıllanıwshı shaxslardıń internettegi telegram sociallıq tarmaqları arqalı "Súwrettegi senbiseń," "videonı ashıp kór," "Sud qararı," "Toyǵa mirátnama" sıyaqlı APK fayl qosımshaların ashpań, onlayn tárizde pulıńızdı kóbeytip beriw hámde atıńızǵa kredit rásmiylestirip beriw wádelerine hámde basqa aymaqlardan kelip hár qıylı buyımlardı satıp júrgen shaxslardıń aldawshılıǵına isenbeń;
- úyińizdiń esik hám aynaları bekkemligine itibar beriń, kóshelerde, úyińiz átirapında mal-múlkińizdi, kerekli buyımlarıńızdı, ashıq maydanlarda hám jol boylarında sharwa mallarıńızdı qarawsız qaldırmań.
- avtomashina esikleri hám aynaların ashıq qaldırmań, avtomashina ishinde pul hám basqa da qımbat bahalı zatlarıńızdı, sonday-aq, avtomashina giltlerin qaldırıp transport quralın alıp qashıw jınayatınıń kelip shıǵıwına jol qoymań;
Húrmetli rayon turǵınları!
Jáne bir márte ayrıqsha atap ótemen, jınayattıń hár qanday kórinisine jedel múnásibet bildiriwge, jınayat islegenlerge jazanıń sózsiz ekenligi támiyinleniwine jeke kepillik beremen.
Bárshemiz jınayattan jıraq jańa Ózbekstan ushın birleseyik!!!
Itibarıńız ushın raxmet.