“El-yurt umidi" qorı stipendiatı, Kegeylishi qız Evropa parlamentinde stajirovka ótedi
2026-01-10 14:30:00 / Министрлик
"El-yurt umidi" qorınıń stipendiatı, Glazgo universitetiniń magistrantı, Kegeylishi Nursulyu Kokanova Evropa parlamentinde Bilimlendiriw siyasatı baǵdarı boyınsha bir aylıq stajirovka ótedi.
Stajirovka dawamında Nursulyu Evropa Awqamınıń bilimlendiriw siyasatın qáliplestiriw hám ámelge asırıw processleri haqqında tolıq túsinik aldı. Evropa Awqamınıń bilimlendiriw, jaslar hám mádeniyat tarawındaǵı áhmiyetli baǵdarlarına, Evropa parlamentiniń institucionallıq dúzilistine, sonday-aq, milliy dárejeden joqarı bolǵan siyasiy qararlar qabıl etiw mexanizmlerine ayırıqsha dıqqat awdarıldı.
Bir ay dawamında Nursulyu Kokanova Evropa parlamentiniń hár qıylı bólimleriniń wákilleri hám jetekshi qánigeler menen ushırasıwlarǵa qatnastı. Atap aytqanda, Isabelle Garcia Tamara menen FEMM komitetin qollap-quwatlawshı siyasiy departament xızmeti, Jean-Francois Hynderick penen Evropa esap palatası tárepinen oqıw baǵdarlamaların finanslıq baqlaw, Christiaan Van Lierop penen Evropa parlamentiniń izertlew xızmeti (EPRS) analitikalıq hám ilimiy-izertlew jumısları boyınsha mazmunlı pikir alısıwlar ótkerildi.
Sonday-aq, Elodie Carmona, Katharina Vinson, Joanna Apap hám Mariusz Maciejewski menen ushırasıwlar sheńberinde Evropa Awqamınıń bilimlendiriw siyasatınıń huqıqıy, institucionalıq hám ámeliy tárepleri tolıq qarap shıǵıldı.
Ámeliyat sheńberinde Nursulyu Kokanova Erasmus+ baǵdarlaması, jaslar siyasatı, bilimlendiriwde teńlik hám inklyuziya, sonday-aq, sanlı ortalıqta jaslardı qollap-quwatlaw máselelerine arnalǵan is-ilajlar hám talqılawlarda belseńli túrde qatnastı.
Bul ámeliyat stipendiattıń xalıqaralıq bilimlendiriw siyasatı tarawındaǵı kásiplik qábiletlerin arttırıw, Evropa tájiriybesin tereń úyreniw hám keleshekte bilimlendiriw tarawında nátiyjeli baslamalardı alǵa ilgeriletiwge bekkem ámeliy tiykar bolıp xızmet etti.