Beruniyde hayal-qızlar isbilermenligi rawajlanbaqta. Zamanagóy sharayatlardan paydalanıp atırǵan apa-sińlilerdiń jumısı obektiv orayında.
2025-11-04 15:55:00 / Media ilajlar
Press-turdıń dáslepki mánzili "Ónerment hoji ana kárxanası" boldı. Jumagúl ana Reyimbaeva basshılıq etip atırǵan cexta 20 túrdegi tigiwshilik ónimleri kórpe, kórpeshe, kópshik hám kelinlerdiń sarpayları tayarlanadı. Paxta hám sintifon shiyki zatınan tayarlanatuǵın bul kórpeler, Qıtay texnologiyası tiykarında tigilip, ishki bazarǵa baǵdarlanadı. Zamanagóy tigiw mashinaları hám apparatları 3 minutta bir kórpeni tayar tigip beredi. Eger qolda tigilse, bir kún waqıt ketedi dedi biz benen sáwbette ónerment ana. 6 turaqlı jumısshı, 100 den aslam shákirt tayarlaǵan Jumagúl ananıń kelinleri de bul ónerdi iyelegen.10 jıl dawamında úy sharayatında hár qıylı mazalı zatlar pisirgen jas isbilermen, endi máhálle kompleksinde jumısın dawam ettirmekte. Nan hám milliy mazalı zatlar pisirip, dúkanlarǵa jetkerip beriw menen birge xalqımızdıń jaqsı kúnlerine, toy-merekelerge de buyırtpalar alıp, shákirtleri menen birge xızmet kórsetiwdi baslaǵan. Negizinde bul jaratılıp atırǵan imkaniyatlardıń barlıǵı elimizde hayal-qızlardıń jámiettegi rolin arttırıw, abadanlıǵın támiyinlew, shańaraǵına dáramat alıp kiriw, kásip-ónerli etiw jolında alıp barılıp atırǵan háreketler bolıp esaplanadı.
Press-turdıń keyingi mánzili Shimom awıl puqaralar jıyını aymaǵında Ózbekstan Respublikası Prezidentiniń 2021-jıl 18-sentyabrdegi "Islam rawajlanıw banki hám OPEK xalıqaralıq rawajlanıw qorı qatnasıwında "Awıllıq jerlerdi turaqlı rawajlandırıw" joybarın ámelge asırıw ilajları haqqında"ǵı PQ-5246-sanlı qararına tiykarlanıp qurılǵan máhálle.