Ministrler Keńesiniń Baslıǵı puqaralardı qabıl etip, olardıń múrájatların kórip shıqtı
2025-11-03 20:05:00 / Ministrlik
Ministrler Keńesiniń Baslıǵı puqaralardı qabıl etip, olardıń múrájatların kórip shıqtı
Búgin Qaraqalpaqstan Respublikası Ministrler Keńesiniń Baslıǵı F.Ermanov puqaralardıń múrájatların tıńlap, olardı ornında unamlı sheshiw ilajları belgilendi. Qabıllaw dawamında puqaralar tárepinen bildirilgen múrájatlar hám usınıslar hár tárepleme úyrenildi.
Ushırasıw dawamında puqaralardıń sociallıq-ekonomikalıq máselelerge baylanıslı, sonıń ishinde, turaq jay menen támiyinlew, bántlik, Kadastr máseleleri, materiallıq járdem, bilimlendiriw hám kommunallıq xızmetlerge baylanıslı múrájatları tıńlandı. Hár bir másele boyınsha tiyisli ministrlikler hám uyımlardıń basshılarına anıq tapsırmalar berildi.
Ministrler Keńesiniń Baslıǵı puqaralardıń múrájatların óz waqtında, nızam sheńberinde sheshiw, olardıń turmıs sapasın jaqsılaw hám sociallıq ádillikti támiyinlew mámleketlik siyasattıń tiykarǵı baǵdarlarınan biri ekenin atap ótti.
Sonday-aq, qabıllaw juwmaǵında ayırım múrájatlardı ornına shıǵıp úyreniw hám ámeliy sheshim islep shıǵıw boyınsha juwapker shólkemlerge tapsırmalar berildi.
Bul qabıllaw puqaralar menen ashıqtan-ashıq sóylesiwdi jolǵa qoyıw, olardıń mashqalaların sistemalı túrde sheshiw hám mámleketlik basqarıw uyımlarınıń jumısında xalıqtıń máplerin ústin qoyıwǵa xızmet etpekte.