Qaraqalpaqstan Respublikası Ministrler Keńesiniń Baslıǵı F.Ermanov bank tarawı wákilleriniń qatnasıwında isbilermenlik subyektleri menen ashıqtan-ashıq sóylesiw ótkerdi
2025-07-21 12:05:00 / Ministrlik
Bul ushırasıwdan gózlengen tiykarǵı maqset - Mámleketimiz basshısınıń 2025-jıl 27-yanvardaǵı PP-10-sanlı Pármanı sheńberinde qarjılandırılıwı belgilengen investiciyalıq joybarlardı kórip shıǵıw, ushırasıp atırǵan mashqalalar menen tosqınlıqlardı úyreniw, olardı saplastırıw boyınsha ámeliy ilajlar belgilew, sonday-aq, bank sisteması menen nátiyjeli birge islesiwdi támiyinlewden ibarat boldı.
Ushırasıwda qatnasqan isbilermenler tárepinen kredit ajıratıwdaǵı bar mashqalalar, girew támiynatı, kepillik máseleleri, bank xızmetleriniń jedelligi hám sapası, sonday-aq, finanslıq qollap-quwatlaw boyınsha bir qatar múrájat hám usınıslar bildirildi.
Ministrler Keńesiniń Baslıǵı tárepinen hár bir múrájat itibar menen tıńlanıp, tiyisli shólkem hám bank basshılarına bar mashqalalardı ornında sheshiw, isbilermenler menen sistemalı islesiw jáne olardıń baslamaların qollap-quwatlaw boyınsha anıq wazıypalar júklendi.