"Korrupciyaǵa qarsı gúresiw - mámleketlik siyasattıń tiykarǵı baǵdarı"
2025-05-28 17:00:00 / Ministrlik
2025-jıl 18-20-mart kúnleri parlamenttiń mákemeleraralıq isshi toparı tárepinen Qaraqalpaqstan Respublikasında kriminogen jaǵdaydı turaqlastırıw hám korrupciyaǵa qarsı gúresiw tarawında ámelge asırılǵan jumıslardıń jaǵdayın úyreniw dawamında anıqlanǵan mashqalalardı saplastırıw boyınsha ilajlar Jol kartası Korrupciyaǵa qarsı gúresiw milliy keńesi tárepinen tastıyıqlanǵan.
Usı jol kartaǵa tiykar Korrupciyaǵa qarsı gúresiw agentligi hám Qaraqalpaqstan Respublikası korrupciyaǵa qarsı gúresiw aymaqlıq keńesi tárepinen “Tórtkúl rayonın korrupciyadan awlaq aymaqqa aylandırıw” boyınsha 21 bántten ibarat jol kartası tastıyıqlandı.
Sonday-aq, usı jıldıń may ayında Ózbekstan Respublikası Senatı Baslıǵı T.Narbaeva, Bas prokurorı N.Yo’ldoshev hám Korrupciyaǵa qarsı gúresiw agentligi direktorı A.Burxanovlar tárepinen “Qaraqalpaqstan Respublikasında korrupciyanıń aldın alıw, oǵan qarsı gúresiw, sonıń menen birge, turmıslıq korrupciyaǵa shek qoyıw, korrupciyaǵa mawasasız qatnasta bolıw ortalıǵın qáliplestiriw” boyınsha 26 bántten ibarat jol karta tastıyıqlandı.
Usı jol kartalarda berilgen tapsırmalardıń orınlanıwın támiyinlew maqsetinde Qaraqalpaqstan Respublikası Joqarǵı Keńesiniń Sud-huqıq máseleleri hám korrupciyaǵa qarsı gúresiw komiteti baslıǵı A.Atajanov basshılıǵında jıynalıs shólkemlestirildi. Jıynalısqa Joqarǵı Keńestiń komitet baslıǵı Sh.Ótemisov, Qaraqalpaqstan Respublikası prokuraturası bólim baslıǵı R.Sankibaev hám Ministrler Keńesiniń korrupciyaǵa qarsı ishki qadaǵalaw bólimi baslıǵı B.Matmuratovlar qatnastı.
Sonday-aq, jıynalısqa Ministrler Keńesiniń juwaplı xızmetkerleri hám 60 tan aslam mámleketlik uyımlar, shólkemler hám kárxanalardıń korrupciyaǵa qarsı ishki qadaǵalaw bólimi xızmetkerleri hámde qala (rayon) hákimlikleri xızmetkerleri ZOOM platforması arqalı qatnastı.
Qaraqalpaqstan Respublikası prokuraturasında jol kartalardıń orınlanıwın qadaǵalap barıw boyınsha turaqlı islewshi shtab shólkemlestirildi hám tiyisli uyımlar tárepinen kúnlik maǵlıwmatlar shtabqa usınılıp barılmaqta.
Jıynalıs barısında jol kartada belgilengen wazıypalar hám tapsırmalar hár tárepleme dodalandı. Tiyisli uyım wákilleri ózlerine tiyisli bántlerdiń orınlanıwı boyınsha ózleriniń málimlemelerin usındı.
Jıynalıs juwmaǵı boyınsha bul baǵdarda jumıslardı elede jetilistiriw boyınsha qosımsha kórsetpeler hám tapsırmalar berilip, jıynalıs nátiyjesi boyınsha qarar qabıl etildi.
Májilis qatnasıwshıları ózlerin qızıqtırǵan sorawlarına juwaplar aldı.