"Salamatlıq aylıǵı" sheńberinde Qaraqalpaqstanda iygilikli baslamalar ámelge asırıldı
2025-05-05 10:55:00 / Ministrlik
"Salamatlıq aylıǵı" sheńberinde Qaraqalpaqstanda iygilikli baslamalar ámelge asırıldı
Ózbekstan Respublikası Densawlıqtı saqlaw ministrliginiń baslaması menen elimiz boylap ótkerilip atırǵan "Salamatlıq aylıǵı" sheńberinde elimizde xalıqtıń salamatlıǵın bekkemlewge qaratılǵan bir qatar iygilikli jumıslar ámelge asırılmaqta. Mine usınday iygilikli háreketlerden biri Qaraqalpaqstandaǵı medicina institutınıń klinikasında da ótkerildi.
Usı ilaj sheńberinde Akademik V.Vohidov atındaǵı Respublikalıq qánigelestirilgen xirurgiya ilimiy-ámeliy medicina orayınıń Tuwma júrek nuqsanları bólimi baslıǵı, kardioxirurg Umid Murodov basshılıǵındaǵı qánigeli shıpakerler jámááti Institutǵa kelip, júreginde tuwma nuqsanı bolǵan balalardı kózden ótkerdi. 40 qa shamalas bala tereń medicinalıq tekseriwden ótkerilip, olardıń arasınan júrek nuqsanı anıqlanǵan balalar tańlap alındı hám biypul xirurgiyalıq ámeliyatlar baslap jiberildi.
Házirgi waqıtta 10 balaǵa júrek nuqsanların emlew ushın ámelge asırılatuǵın operaciyalardıń reje-grafik dúzilgen. Bunday qayırqomlıq tiykarındaǵı joqarı insanıylıq baslamalar, álbette, kóplegen shańaraqlarǵa úmit hám shıpa baǵıshlamaqta.
Bul ilaj tek ǵana medicinalıq jaqtan emes, al jámiyette awızbirshilik hám keńpeyillik pazıyletlerin bekkemlewde de úlken áhmiyetke iye ekenin atap ótiw kerek.
"Salamatlıq aylıǵı" sheńberindegi bunday ámeliy jumıslar jaqsılıq, miyrim-shápáát hám shıpa úlestiriw jolındaǵı áhmiyetli qádemler bolıp esaplanadı.