Búgin Qaraqalpaqstan Respublikası Ministrler Keńesi Baslıǵınıń orınbasarı Shańaraq hám hayal-qızlar komitetiniń baslıǵı M.Axmedova puqaralar, ásirese hayal-qızlardıń mashqalaların úyreniw hám sheshiw maqsetinde óziniń gezektegi qabıllawın ótkerdi.
2025-04-30 16:55:00 / Ministrlik
Qabıllaw procesinde puqaralar ózlerin qıynap atırǵan mashqalalar, pikir-usınıslar menen múrájat etti. Múrájatlar tiykarınan jumıs penen támiyinlew hám bántlikti támiyinlew, turaq jay hám kommunallıq xızmetler menen baylanıslı mashqalalar, medicinalıq xızmetten paydalanıw imkaniyatları, sociallıq napaqalar hám materiallıq járdem máseleleri boyınsha múrájatlar boldı. Qabıllaw dawamında hár bir múrájat ayrıqsha úyrenilip, ornında sheshiliwi múmkin bolǵan mashqalalar boyınsha tiyisli ilajlar kórildi. Ayırım máseleler bolsa juwapker uyımlardıń qadaǵalawına alınıp, huqıqıy hám ámeliy járdem kórsetiliwi támiyinlendi.
Qabıllaw dawamında puqaralar tárepinen bunday ushırasıw hám qabıllawlar arqalı mámleketlik uyımlarǵa múrájat etiw, óz mashqalalarına sheshim tabıw imkaniyatı jaratılıp atırǵanın jıllı júzlilik penen atap ótti. Bul bolsa elimizde insan máplerin támiyinlew, ásirese, hayal-qızlardıń sociallıq belsendiligin arttırıwǵa qaratılǵan reformalardıń nátiyjesi sıpatında kózge taslanbaqta.